روٹ نے دراوڑ اور اسمتھ کو پیچھے چھوڑا

یواین آئی

لندن/انگلینڈ کے بلے باز جو روٹ نے ہندوستان کے خلاف تیسرے ٹیسٹ میں شاندار سنچری بنا کر لیجنڈری بلے باز راہل دراوڑ اور اسٹیو اسمتھ کو پیچھے چھوڑتے ہوئے ٹیسٹ کرکٹ میں سب سے زیادہ سنچریاں بنانے والے کھلاڑیوں کی فہرست میں ٹاپ 5 میں جگہ بنا لی ہے ۔ روٹ کی یہ 37ویں ٹیسٹ سنچری تھی، جو انہوں نے لارڈز کے میدان میں عمدہ انداز میں مکمل کی۔روٹ اب اس فہرست میں صرف سچن تیندولکر 51، ژاک کیلس 45، رکی پونٹنگ 41 اور کمار سنگاکارا 38 سے پیچھے ہیں۔ انہوں نے اس میدان پر لگاتار تیسری ٹیسٹ سنچری بھی بنائی ۔اس سے پہلے انہوں نے یہاں 143 اور 103 رنز بنائے تھے ۔ اس طرح وہ جیک ہوبس 1912-1926اور مائیکل وان 2004-2005 کے بعد لارڈز میں مسلسل تین ٹیسٹ سنچریاں بنانے والے تیسرے کھلاڑی بن گئے ہیں۔ ہندوستان کے خلاف ان کی شاندار کارکردگی جاری ہے ، یہ ہندوستان کے خلاف ان کی 11ویں ٹیسٹ سنچری ہے ۔