کراچی/پاکستانی گراو¿نڈ میں انٹرنیشنل فٹبالر کھیلتے دکھائی دیں گے جب کہ اس حوالے سے برازیل کے رونالڈینو اور انگلینڈ کے رائن گگز سمیت 8 انٹرنیشنل فٹبالرز آج پاکستان پہنچ رہے ہیں۔غیرملکی فٹبالرز 2 نمائشی میچز ہفتہ اور اتوار کو کھیلیں گے جس کا اہتمام کراچی اور لاہور میں کیا گیا ہے۔ پاکستان آنے والے فٹبالرز میں رونالڈینو اور رائن گگز کے علاوہ رابرٹو کارلوس، ڈیوڈ جیمز، جارج بوٹینگ، رابرٹ پیریس، لوئس با مورٹے اور نکولس اینلکا شامل ہیں۔غیرملکی اور مقامی کھلاڑیوں پر مشتمل دو ٹیمیں بنائیں جائیں گی جب کہ پاکستانی کھلاڑیوں کا انتخاب کراچی، لاہور اور اسلام آباد میں ہونے والے میچز میں ان کی کارکردگی کی بنیاد پر کیا گیا ہے۔نمائشی میچز میں ایک ٹیم 7 کھلاڑیوں پر مشتمل ہوگی جب کہ ایک ٹیم کی قیادت رونالڈینو اور دوسری ٹیم رائن گگز کی قیادت میں میدان میں اترے گی۔پاکستان میں انٹرنیشنل معیار کا اسٹیڈیم نہ ہونے کی وجہ سے پہلا نمائشی میچ کراچی کے ہاکی کلب اسٹیڈیم اور دوسرا میچ لاہور کے فور ٹریس اسٹیڈیم میں کھیلا جائے گا جب کہ دونوں میچز میں سیکیورٹی کی ذمہ داری پاک فوج کے ذمے ہے۔ پاکستان کے انٹرنیشنل فٹبالر کلیم اللہ بھی ان 2 نمائشی میچوں میں حصہ لیں گے جس کے لیے وہ خصوصی طور پر امریکا سے پاکستان آئے ہیں جو ان دنوں امریکا میں فٹبال لیگ کھیل رہے تھے۔کلیم اللہ کا کہنا ہے کہ دنیا کے معروف 8 فٹبالرز کے پاکستان آنے سے یہاں فٹبال کو فروغ ملے گا اور خاص طور پر نوجوان طبقے میں اس کھیل سے متعلق جوش وخروش بڑھے گا۔کلیم اللہ کے مطابق پاکستانی فٹبال کا سب سے بڑا المیہ یہ ہے کہ ملک میں نہ کوئی بین الاقوامی معیار کا میدان ہے نہ ہی کوئی اکیڈمی ہے جس کی وجہ سے ٹیلنٹ ضائع ہو رہا ہے۔
رونالڈینو سمیت 8 انٹرنیشنل فٹبالر آج پاکستان پہنچیں گے
