لندن //پرتگال سے تعلق رکھنے والے اسٹار فٹبالر کرسٹیانو رونالڈو مسلسل دوسری مرتبہ فیفا فٹبالر آف دی ایئر بن گئے ہیں جبکہ سابق فرانسیسی کپتان اور ہسپانوی کلب کے کوچ زین الدین زیدان کو سال کا بہترین کوچ قرار دیا گیا ۔کرسٹیانو رونالڈو ارجنٹینا سے تعلق رکھنے والے شہرہ آفاق فٹبالر لیونل میسی کے مقابلے میں کامیاب قرار پائے جبکہ انہوں نے مسلسل دوسری مرتبہ یہ ایوارڈ اپنے نام کیا ہے ۔یاد رہے کہ گزشتہ برس اسٹار فٹبالر کرسٹیانو رونالڈو نے بیلن ڈی اور کے بہترین کھلاڑی ہونے کا اعزاز بھی اپنے نام کیا تھا جہاں ان کا مقابلہ ارجنٹینا کے لیونل میسی سے ہی تھا۔کرسٹیانو رونالڈو 5 مرتبہ بیلن ڈی اور ایوارڈ حاصل کرنے کے ساتھ ساتھ متعدد مقامی اور بین الاقوامی ایوارڈز اپنے نام کر چکے ہیں۔دی بیسٹ فیفا فٹبال ایوارڈز کے نام سے تقریب لندن میں منعقد ہوئی جس میں بہترین گول کیپر، کوچ اور خواتین فٹبالر کا بھی ایوارڈ دیا گیا۔سابق فرانسیسی کپتان اور ہسپانوی کلب کے کوچ زین الدین زیدان کو سال کا بہترین کوچ قرار دیا گیا جبکہ اٹلی کے گول کیپر جیان لوگی بفون کو بہترین گول کیپر کے ایواڈ سے نوازا گیا جسے پہلی مرتبہ ایوارڈز میں متعارف کرایا گیا ہے ۔سال کی بہترین خواتین فٹبالر کا ایوارڈ ہالینڈ کی لیکی مارٹینز کے نام رہا جبکہ بہترین خاتون کوچ کا ایوارڈ بھی ان ہی کی قومی ٹیم کی کوچ سرینا ویہمن کے نام رہا۔ لندن میں منعقد فیفا ایوارڈ کا میلہ جس میں سال کے بہترین کھلاڑیوں، گول کیپر اور کوچز کو دیئے گئے اعزازات، 2017 کے بہترین کھلاڑی کیلئے تین سپر اسٹارز رونالڈو، میسی اور نیمار میں مقابلہ ہوا۔پرتگالی اسٹار نے 5 سال میں چوتھی بار بہترین کھلاڑی کے ایوارڈ پر قبضہ جمایا۔رونالڈو نے کامیابی کا کریڈٹ ریال میڈرڈ کے کھلاڑیوں، کوچز اور اسٹاف ممبرز کو دیا۔ آرسنل ٹیم کے الیویئر گیرود کو دوہزار سترہ کے بہترین گول کا ایوارڈ دیا گیا۔یو این آئی۔
رونالڈو مسلسل دوسری مرتبہ فیفا کے بہترین فٹبالر
