عظمیٰ نیوزڈیسک
نئی دہلی//روس اور ہندوستان کے درمیان دوستانہ تعلقات کو مزید مستحکم کرتے ہوئے روس نے 2025سے ہندوستانیوں کو بغیر ویزا کے انٹری کی سہولت دینے کا اعلان کیا ہے۔ یہ فیصلہ دونوں ممالک کے بڑھتے تعلقات کا مظہر ہے، جہاں وزیر اعظم نریندر مودی اور صدر ولادیمیر پوتن مسلسل تعلقات کو مضبوط بنانے پر تبادلہ خیال کرتے رہتے ہیں۔رپورٹ کے مطابق روس کے نئے ویزا قوانین نافذ ہونے کے بعد ہندوستانی شہری بغیر ویزا روس کا سفر کر سکیں گے۔ اس سے قبل، جون 2023 میں دونوں ممالک نے ویزا پابندیوں میں کمی کے حوالے سے بات چیت کی تھی۔ یاد رہے کہ ہندوستانی شہری اگست 2023 سے روس کے لیے ای-ویزا کے اہل ہیں، جس کے اجرا میں تقریبا چار دن لگتے ہیں۔دی انڈین ایکسپریس کی رپورٹ کے مطابق، 2023 میں روس نے ہندوستانیوں کو 9,500 ای-ویزا جاری کیے، اور یہ تعداد روسی حکام کی طرف سے ہندوستانی سیاحوں کے لیے بڑھتی دلچسپی کو ظاہر کرتی ہے۔ 2023 میں 60,000 سے زیادہ ہندوستانیوں نے ماسکو کا سفر کیا، جو 2022 کے مقابلے میں 26 فیصد زیادہ ہے۔اس وقت روس ویزا فری انٹری کی سہولت صرف چین اور ایران کے مسافروں کو دیتا ہے، تاہم ہندوستان کے ساتھ بھی اس سہولت پر غور کیا جا رہا ہے۔ ہندوستان-روس کے قریبی تعلقات پر امریکہ اکثر ناپسندیدگی کا اظہار کرتا رہا ہے۔ حالیہ بیان میں نکی ہیلی نے کہا کہ ہندوستان روس کے ساتھ شراکت داری اس لیے کرتا ہے کیونکہ اسے امریکی قیادت پر بھروسہ نہیں ہے۔
