عظمیٰ نیوزسروس
جموں//لیفٹیننٹ گورنر منوج سنہا نے ویشنو دیوی یونیورسٹی کی ایگزیکٹو کونسل کی 35ویں میٹنگ کی صدارت کی۔ میٹنگ میں فیکلٹی ممبران کے کیرئیر ایڈوانسمنٹ پروموشن، نان ٹیچنگ سٹاف ممبران کی غیر فنکشنل پروموشن، انرولمنٹ میں اضافہ، کیمپس پلیسمنٹ، یونیورسٹی کے آؤٹ ریچ پروگرامز، جدت اور سٹارٹ اپس کے فروغ، تحقیق، تربیت سے متعلق کئی اہم تعلیمی اور انتظامی امور پر تبادلہ خیال کیا گیا۔لیفٹیننٹ گورنر نے معیشت کے مختلف شعبوں کی دستیابی اور ضرورت کے درمیان فرق کو ختم کرنے کے لیے صلاحیت سازی پر توجہ مرکوز کرتے ہوئے نئے کورسز متعارف کرانے اور موجودہ نصاب کو دوبارہ لکھنے پر زور دیا۔ انہوں نے کہا’’یونیورسٹی کو جدید پروگراموں اور کورسز جیسے ڈیزائن یور ڈگری، آٹومیشن، مصنوعی ذہانت، ڈیٹا سائنس، مینجمنٹ اور آرکیٹیکچر کو شہری اور ٹاؤن پلاننگ میں مہارت کے ساتھ فروغ دینے کے لیے ایک جامع حکمت عملی مرتب کرنی چاہیے۔ ہمیں روزگار کے قابل ہنر کی دستیابی میں خلا کو پر کرنے کی ضرورت ہے۔ ہمیں زبانوں کے سکول کو مضبوط بنانے اور علاقائی زبانوں اور سنسکرت کو فروغ دینے پر بھی توجہ دینی چاہیے‘‘۔ایگزیکٹو کونسل نے اجلاس کے دوران پیش کئے گئے ایجنڈے کے مختلف نکات کی اصولی منظوری دی۔ اجلاس میں قومی تعلیمی پالیسی کے مطابق نصاب اور تعلیمی رہنما خطوط کی ڈیزائننگ، SMVDIME کے تحت فیکلٹی آف میڈیکل سائنسز کی تشکیل اور یونیورسٹی کے مجموعی کام میں مزید کوالٹی بہتری لانے کے لیے دیگر اصلاحات پر بھی غور کیا گیا۔چیئر کو گزشتہ اجلاس کے دوران کیے گئے فیصلوں، جاری تعمیراتی کاموں اور SMVDU- ٹیکنالوجی بزنس انکیوبیشن سنٹر کو مضبوط کرنے کے لیے حالیہ اقدامات کے بارے میں بھی بریفنگ دی گئی۔پروفیسر (ڈاکٹر) پرگتی کمار، وائس چانسلر، شری ماتا ویشنو دیوی یونیورسٹی نے منظوری اور توثیق کے لیے ایگزیکٹیو کونسل کے سامنے ایجنڈا کے مختلف آئٹمز پیش کیے۔
