عظمیٰ نیوز سروس
بانہال// نیشنل کانفرنس (این سی) کے رہنما اور ضلع صدر رام بن میر سجاد شاہین نے لیفٹیننٹ گورنر انتظامیہ سے اپیل کی ہے کہ وہ ضلع رام بن میں خاص طور پر برف متاثرہ بانہال اور گول علاقوں میں برف صاف کرنے کی جدید مشینری کو فراہم کرے۔ شاہین نے کہا کہ یہ بدقسمتی کی بات ہے کہ پورے ضلع رام بن میں ، جہاں برف کا زیادہ خطرہ ہے ، ایک بھی برف کاٹنے والی مشین نہیں ہے اور نہ ہی برف کی گاڑیاں، کٹر اور فرنٹ اینڈ لوڈرز انتظامیہ کے پاس دستیاب ہیں۔ انہوں نے کہا کہ رام بن اور گول میں شدید برف باری ہوتی ہے اور برف کے بھاری جمع ہونے کی وجہ سے کئی دیہات ٹھنڈے موسم میں کئی دنوں تک ضلع ہیڈکوارٹر سے منقطع رہتے ہیں۔ شاہین نے کہا کہ “کچھ علاقوں جیسے مہو منگت، کھڑی، تریگام، نیل، پوگل، مالیگام، پرستان، سراچی، امکوٹ، تھاچی، ہنجھل، چکناروا، چملواس میں چار سے چھ فٹ برف پڑتی ہے۔ انتظامیہ ان علاقوں میں کئی ہفتوں سے برف سے بند سڑکوں کو کھولنے میں ناکام رہتی ہے۔ انتظامیہ کو چاہیے کہ وہ ضلع رام بن کے لیے سنو کٹر اور دیگر برف صاف کرنے والی مشینری فراہم کرے۔ شاہین نے مزید کہا کہ اکثر مقامی ٹھیکیداروں سے انتظامیہ کی طرف سے کرایہ پر لی گئی جے سی بیز کو استعمال میں لایا جاتا ہے، جس سے یہ مقصد حل نہیں ہوتا کیونکہ برف باری والے علاقوں میں دسیوں ہزار دیہاتی علاقے میں شدید برف باری اور بروقت برف صاف نہ ہونے کی وجہ سے منقطع رہتے ہیں۔ شاہین کا مزید کہنا تھا کہ شدید برفباری کے دوران یہ ایک عام بات ہے کہ درجنوں طبی ایمرجنسیوں کو پیدل اسپتالوں میں منتقل کرنا پڑتا ہے کیونکہ زیادہ تر سڑکیں برف کے تودے میں بند رہتی ہیں۔ لوگوں کو اکثر بیماروں کو اسٹریچر پر گھٹنوں تک برف اور غدار راستوں سے لے کر جانا پڑتا ہے۔
