محمد تسکین
بانہال// بانہال سے کاغذات نامزدگی کا ایک پرچہ پی ڈی پی امیدوار امتیاز احمد شان نے داخل کیا جبکہ رام بن سے بھی ایک آزاد امیدوار سوتیش کمار نے کاغذات نامزدگی جمع کرائے۔جمعہ کے روز اسمبلی حلقہ 55 بانہال ۔ گول کے ریٹرننگ افسر رضوان اصغر ، جو ایس ڈی ایم بانہال بھی ہیں ،کے دفتر میں پیپلز ڈیموکریٹک پارٹی لیڈرامتیاز احمد شان نے اپنے کاغذات نامزدگی داخل کئے۔ ان کے ہمراہ پارٹی کے کارکنوں ایک بڑی تعداد موجود تھی۔ اس موقع پر ذرائع ابلاغ سے بات کرتے ہوئے امتیاز احمد شان نے کہا کہ حلقہ انتخاب بانہال اور گول کے لوگوں کو گونا گوں مشکلات کا سامنا ہے اور آج بھی بیروزگاری کے ساتھ ساتھ تعلیمی اور طبی نظام مفلوج ہے جبکہ درجنوں علاقے ابھی بھی سڑک رابطوں سے جوڑے نہیں گئے ہیں۔ انہوں نے کہا کہ ابھی بھی شگن ، سربگنی ، کھڑی ، ترگام ، پوگل پرستان اور نیل کے علاقوں میں سڑکیں نہیں ہیں۔ انہوں نے کہا کہ ہزاروں کروڑ روپئے کی لاگت سے نیشنل ہائے وے پروجیکٹ تعمیر کیا جارہا ہے لیکن ہمارے بیروزگار نوجوانوں کو اس پروجیکٹ سے کوئی فائدہ نہیں ملا اور ہمیں بیروزگاری کیلئے بات کرنی ہے۔ امتیاز شان نے کہا کہ اگر لوگوں نے انہیں اپنا اعتماد دیا تو وہ رشوت خوری کا نظام ختم کرینگے اور صاف و شفاف انتظامیہ کو یقینی بنائیں گے ۔ انہوں نے کہا کہ وہ پیسے کمانے کیلئے سیاست میں نہیں آئے ہیں بلکہ وہ غریب اور ناداروں کی مدد کیلئے سیاست میں آئے ہیں ۔ انہوں نے کہا کہ یہاں کانگریس سمیت دیگر پارٹیوں کے تعمیر و ترقی کے دعوے زمینی سطح پر موجود نہیں ہیں اور حلقہ انتخاب بانہال میں کوئی ترقی نہیں ہوئی ہے۔ اس دوران حلقہ انتخاب رام بن سے آزاد امیدوار سوتیش کمار نے اپنے کاغذات نامزدگی ریٹرننگ افسر رام بن کے پاس جمع کرائے۔
