سمت بھارگو
راجوری//ضلع راجوری میں مون سون کے موسم کے دوران عوامی تحفظ کو مدنظر رکھتے ہوئے ضلع مجسٹریٹ راجوری، ابھیشیک شرما نے بی این ایس ایس 163 کے تحت حکم نامہ جاری کیا ہے، جس کے مطابق ندی، نالوں، چشموں اور دیگر آبی ذخائر کے قریب نہانا، تیرنا، ماہی گیری اور گھومنا پھرنا مکمل طور پر ممنوع قرار دیا گیا ہے۔حکم نامے میں حالیہ بارشوں کے دوران ندی نالوں میں ڈوبنے اور دیگر حادثات کا حوالہ دیتے ہوئے عوام سے احتیاط برتنے کی اپیل کی گئی ہے۔ اس کے علاوہ، اسکولوں اور کالجوں کی جانب سے ندی نالوں کے قریب کسی بھی قسم کی پکنک یا تفریحی سرگرمیوں پر بھی پابندی عائد کر دی گئی ہے، جب تک کہ اس کی باضابطہ اجازت ضلعی انتظامیہ سے نہ لی جائے۔ضلعی مجسٹریٹ نے تمام ایڈیشنل ڈپٹی کمشنرز، سب ڈویژنل مجسٹریٹس، تحصیلداروں، نائب تحصیلداروں اور پولیس کے افسران بشمول ایس ایچ اوز اور انچارج پولیس پوسٹوں کو ہدایت دی ہے کہ اس حکم کی سختی سے عمل درآمد کروایا جائے۔دوسری جانب، ضلع ترقیاتی کمشنر راجوری ابھیشیک شرما نے مون سون کے دوران کسی بھی ممکنہ ہنگامی صورتحال سے نمٹنے کے لیے تیاریوں کا جائزہ لینے کیلئے ایک اہم اجلاس کی صدارت بھی کی۔ڈی سی راجوری نے شاہراہوں اور دیگر اہم سڑکوں پر فوری صفائی اور بحالی کے لئے مشینری کو تیار رکھنے کی ہدایت دی۔ بی آر او، پی ڈبلیو ڈی اور پی ایم جی ایس وائی کو متبادل راستے شناخت کرنے اور سڑکوں کی بروقت مرمت کے لئے تیار رہنے کو کہا گیا۔طبی ایمرجنسی کی صورت میں، محکمہ صحت کو ہسپتالوں میں ضروری ادویات بالخصوص سانپ کے کاٹنے کی دوا کی دستیابی یقینی بنانے کی ہدایت دی گئی۔ڈی سی راجوری نے تمام ایڈیشنل ڈپٹی کمشنرز، اے سی آرز اور ایس ڈی ایمز کو ہدایت دی کہ وہ تحصیل اور سب ڈویژن سطح پر کنٹرول روم قائم کریں اور ضلعی سطح پر قائم مرکزی کنٹرول روم کے ساتھ قریبی رابطہ بنائے رکھیں۔انہوں نے مزید کہا کہ عوام کو بروقت آگاہ رکھنے کے لئے نمائندگان، نمبرداروں، چوکیداروں اور دیگر مقامی اہلکاروں کے ذریعے اطلاعات اور ہدایات عام کی جائیں۔اس اجلاس میں ایس ایس پی گورو سِکروار، اے ڈی سی چندر پرکاش، ایس ای پی ڈبلیو ڈی، ایس ای اریگیشن اور دیگر ضلعی و سیکٹورل افسران نے بذریعہ ورچوئل موڈ شرکت کی۔ضلعی انتظامیہ نے عوام سے اپیل کی ہے کہ وہ حفاظتی ہدایات پر سختی سے عمل کریں اور مون سون کے دوران سیلاب زدہ علاقوں میں غیر ضروری نقل و حرکت سے گریز کریں۔
