عظمیٰ نیوز سروس
راجوری//مرکزی شہر راجوری میں جموں سنٹرل کوآپریٹو بینکس کی مرکزی شاخ کل رات آگ لگنے کے ایک بڑے واقعہ میں جل کر خاکستر ہوگئی۔یہ راجوری کا سب سے پرانا بینک ہے اور گزشتہ ساڑھے چار دہائیوں سے زیادہ کام کر رہا تھا۔بینک کی شاخ مرکزی قصبہ راجوری میں واقع ہے اور پیر اور منگل کی درمیانی شب اس سے آگ کے شعلے بھڑک اٹھے اور پوری بینک کی شاخ آگ کی لپیٹ میں آگئی۔ پولیس حکام نے کہاکہ رات کی گشتی ٹیموں نے شاخ سے آگ کے شعلے بھڑکتے ہوئے دیکھا جس نے الارم بجا دیا اور فائر فائٹنگ آپریشن شروع کیا گیا۔جموں و کشمیر فائر اینڈ ایمرجنسی سروسز اور مقامی پولیس کی طرف سے مقامی لوگوں کی مدد سے آگ بجھانے کا ایک بڑا آپریشن شروع کیا گیا اور گھنٹوں کی مسلسل کوششوں کے بعد آگ پر قابو پایا گیا۔انہوں نے کہا کہ آگ بجھانے کے کامیاب آپریشن نے اس بات کو یقینی بنایا کہ آگ کے شعلے قریبی عمارتوں میں نہ پھیلیں لیکن بینک کی برانچ مکمل طور پر تباہ ہو گئی اور تمام دستاویزات کے ساتھ ساتھ اندر پڑی نقدی بھی راکھ ہو گئی۔ان کا مزید کہنا تھا کہ بینک برانچ کے اندر پڑے تمام کاغذات فرنیچر اور دیگر بنیادی ڈھانچے کے ساتھ راکھ ہو گئے جبکہ برانچ کے سیف باکس میں پڑی نقدی، جس کی تقریباً 5 لاکھ مالیت متوقع تھی، بھی جل کر خاکستر ہو گئے۔85 سالہ تجربہ کار تاجر وریندر ملہوترا نے کہا کہ متاثرہ شاخ قصبے کی سب سے پرانی شاخ ہے اور تقریباً ساڑھے چار دہائی قبل قائم کی گئی تھی۔انہوں نے کہا کہ اس بینک کو نقصان پہنچانا ایک افسوس ناک واقعہ ہے جس سے لوگوں کے جذبات بھی متاثر ہوئے ہیں۔انکامزید کہناتھا’’یہ سب کے لیے خوش قسمتی ہے کہ پولیس، فائر اور ایمرجنسی سروسز اور مقامی لوگوں نے فوری طور پر جواب دیا اور آگ کے شعلوں کو قریبی عمارتوں تک پھیلنے سے روک دیا‘‘۔
