رابطہ سڑک خستہ حال اور بنیادی ڈھانچے کی عدم دستیابی قدرتی خوبصورتی سے مالامال پنیر جاگیر سرکار کی نظروں سے اوجھل

 سید اعجاز

ترال// ترال سے 7 کلو میٹر دور خوبصورت کائرو اوردیودارکے گھنے خوبصورت جنگلات کے دامن میں پنیر جاگیر نامی گائوںآباد ہے جو قدرتی خوبصورتی سے مالامال ہے۔ گھنے اور سرسبز وشاداب درختوں نے اس گائوں کی خوبصورتی میں چار چاند لگائے ہیں ۔گائوں کے اوپری حصے میں خوبصورت پہاڑوں کے بیچ ایک ڈیم بھی ہے جس میں سال بھر پانی جمع رہتا ہے جو موسم سرما میں منفی درجہ حرارت کے دوران جم جاتا ہے۔اس علاقے کو دیکھنے کیلئے لوگوں کی بڑی تعدادہر موسم میں یہاں آتی ہے۔مقامی لوگوں کے ساتھ ساتھ سیاح بھی برف باری کے دوران یہاں آتے ہیںاور خوبصورتی سے لطف اندوز ہوتے ہیں ۔ شدید گرمی کے رواں ایام میںمقامی لوگوں کے ساتھ ساتھ کشمیر کے مختلف علاقوں سے تعلق رکھنے والے طلباء اور سیلانی یہاں آتے ہیں۔ایام عید کے دوران مسلسل 3روز یہاں لوگوں کی ایک بڑی تعداد دیکھنے کو ملی تاہم رابط سڑک کی خستہ حالی اور ڈیم کے مقام پر بنیادی ڈھانچہ کی عدم دستیابی کے باعث لوگوںکو مشکلات کا سامنا کرنا پڑ رہا ہے۔پانپور سے یہاں آئے ایک کنبے نے بتایا کہ یہ علاقہ واقعی خوبصورتی سے مالا مال ہے ۔انہوں نے بتایا کہ مندورہ ترال سے مختلف قسم کے درختوں کو دیکھ کر واقعی قدرت کا احساس ہوتا ہے ۔انہوں نے مزید بتایا کہ مندورہ نامی گائوں سے سڑک خستہ حال ہے جو ایک پریشانی ہے جبکہ بیشتر مقامات پر سڑک کو کشادہ کرنے کی بھی ضرورت ہے ۔پلوامہ کے ایک سیلانی طارق احمد ڈار نے بتایا کہ سڑک رابط کو بہتر بنانے کی ضرروت ہے اور یقیناً یہ ایک بہترین صحت افزا مقام کے طور پر ابھرسکتاہے ۔