حکومت شہریوں پر مرکوز گورننس کے لئے پرعزم : وزیر اعلیٰ
سرینگر//جموں و کشمیر کے لوگوں کے ساتھ براہ راست رابطے بڑھانے کی جانب ایک اہم قدم کے طور پر، وزیر اعلیٰ عمر عبداللہ نے سنیچر کو چیف منسٹر کے پبلک سروسز اینڈ آئوٹ ریچ آفس میں اپنی افتتاحی عوامی بات چیت کی جس کا نام رابطہ ہے۔ وزیر اعلیٰ نے اس موقع پر کہا کہ یہ دفتر عوامی شکایات کے ازالے اور حکومت اور شہریوں کے درمیان صحت مندانہ تعلقات استوار کرنے کے لیے ایک وقف پلیٹ فارم فراہم کرنے کے لیے قائم کیا گیا ہے۔اس موقعہ پر15 کے قریب وفود نے وزیر اعلیٰ سے ملاقات کی جن میں سے ہر ایک مختلف سماجی، ثقافتی اور پیشہ ور گروپوں کی نمائندگی کر رہا تھا۔ وزیراعلی کے نوٹس میں لائے گئے مسائل میںاقتصادی چیلنجوں، ثقافتی تحفظ، روزگار کے خدشات اور شعبہ جاتی ترقی کے ارد گرد معاملات شامل ہیں۔بات چیت میں منفرد ثقافتی ورثے کے تحفظ کو بھی نمایاں طور پر پیش کیا گیا۔ وفود نے جموں و کشمیر کے بھرپور ورثے کو فروغ دینے، مقامی زبانوں کے تحفظ اور سماجی بہبود کے پروگراموں کو نافذ کرنے کے اقدامات کی وکالت کی۔وزیر اعلی نے ان خدشات کو غور سے سنا اور خطے کے منفرد تشخص کے تحفظ کے لیے مربوط نقطہ نظر کی ضرورت پر زور دیا۔
