ذہین طُلاب کو موزون پلیٹ فارم مہیا کرنے کیلئے وعدہ بند : الطاف بخاری

 سرینگر// وزیر تعلیم سید محمد الطاف بخاری نے ایس پی ماڈل ہائر سکینڈری سکول میں2 روزہ سالانہ کتاب نمائش کا افتتاح کیا جس کا انعقاد ڈائریکٹوریٹ آف سکول ایجوکیشن نے کیا ہے جس میں60 سٹالوں کے ذریعے کتابوں کی فروخت اور عکاسی کی جارہی ہے۔اس موقعہ پر خطاب کرتے ہوئے الطاف بخاری نے کہا کہ کُتب بینی اچھی عادت ہے اور اس نمائش کے ذریعے کُتب بینی کو فروغ دینے کی کوشش کی جارہی ہے۔ انہوں نے محکمہ تعلیم میں شروع کئے گئے اصلاحی اقدامات کا تفصیل سے ذکر کیا ۔ انہوں نے کہا کہ ریاست بھر کے تعلیمی اداروں میں رواں تدریسی سیشن سے اساتذہ کی کمی درپیش نہیں آئے گی۔وزیر نے سکول کو اپ گریڈ کرنے اور اساتذہ کی تقرریوں کے لئے رقومات مختص کرانے کے لئے وزیر خزانہ ڈاکٹر حسیب درابو کا شکریہ ادا کیا۔انہوں نے کہا کہ اُن اساتذہ کو مراعات دیئے جائیں گے جو دُور دراز علاقوں میں اپنی خدمات انجام دیں گے۔ انہوں نے کہا جو اساتذہ جموں اور سرینگر اضلاع میں فرائض انجام دیں گے اُن کی تنخواہوںمیںکمی کی جائے گی۔ انہوں نے کہا کہ دُور دراز علاقوں کے سکولوں میں بچوں کی دلچسپی کو بڑھانے کے لئے اقدامات کئے جائیں گے۔ انہوں نے کہا کہ حکومت ذہین طُلاب کو ایک موزوں پلیٹ فارم مہیا کرانے کی وعدہ بند ہے۔الطاف بخاری نے اس دوران جے کے بوس کے ڈائریکٹر اکیڈیمکس ڈاکٹر فاروق احمد پیر کی تصنیف کردہ کتاب A critical Story of the Novels of Chinua Achebe & wole Sovinka  کی رسم رونمائی بھی انجام دی جس کا دیباچہ ڈاکٹر شاہ فیصل نے لکھا ہے۔بعد میں وزیر نے ان طُلاب میں نقد انعامات اور ٹرافیاں تقسیم کیں جنہوں نےSnow art Contest -2017 میں پہلی تین پوزیشنیں حاصل کیں۔تقریب میںسیکریٹری سکولی تعلیم فاروق احمد شاہ، ڈی سی سرینگر عابد رشید شاہ، ناظم تعلیم کشمیر ڈاکٹر جی این ایتو، ناظم رمسا طُفیل متو، ڈائریکٹر اکیڈیمکس جے کے بوس ڈاکٹر فاروق احمد پیر کے علاوہ کئی دیگر افسران موجود تھے۔