عظمیٰ نیوز ڈیسک
نئی دہلی//دہلی این سی آر میں موسم پوری طرح بدل چکا ہے۔ یہاں صبح میں ہلکی دھوپ سے لوگوں کو کافی راحت محسوس ہو رہی ہے۔ دن کے وقت بھی تیز دھوپ نکلنے سے موسم میں کافی گرمی پیدا ہو رہی ہے۔ وہیں دوسری طرف محکمہ موسمیات نے ہماچل پردیش کے کئی حصوں میں بارش کا امکان ظاہر کیا ہے۔اتر پردیش کے زیادہ تر علاقوں میں موسم صاف رہنے کا اندازہ ہے۔ حالانکہ ریاست کے کئی حصوں میں تیز ہوائوں کا اثر ہے۔ دن میں اچھی دھوپ نکل رہی ہے لیکن آگے کچھ دنوں میں کانپور، لکھنو، آگرہ، علی گڑھ، جونپور، وارانسی، پریاگ راج، بریلی، دیوریا اور جھانسی و میرٹھ اور سہارنپور میں ویسٹرن ڈسٹربینس کا اثر دیکھنے کو مل سکتا ہے۔راجستھان میں موسم خشک ہے۔ سیکر ضلع کا فتح پور 3.2 ڈگری سیلسیس کے ساتھ سبسے ٹھنڈا مقام رہا۔ محکمہ موسمیات کے مطابق ہفتہ کی صبح کرولی میں کم سے کم درجہ حرارت 4.3 ڈگری، دوسا میں 4.6 ڈگری، ریاست کے واحد پہاڑی سیاحتی مقام ماونٹ آبو میں 5.2 ڈگری، چورو میں 56 ڈگری اور لون کرنسر میں 5.7 ڈگری درجہ حرارت ریکارڈ کیا گیا۔ دوسری طرف ہریانہ اور پنجاب کے موسم میں اتار-چڑھاو جاری ہے۔ 9 سے 11 فروری تک بارش پنجاب-ہریانہ بارڈر کی طرف جا سکتی ہے۔ 9 اور 10 فروری کو بادل چھائے رہنے کا امکان ظاہر کیا گیا ہے۔ادھر بہار میں بھی دن بھر تیز ہوائیں چل رہی ہیں جس سے ہلکے ٹھنڈ کا احساس ہو رہا ہے۔ لیکن دن میں کھلی دھوپ سے گرمی پیدا ہو رہی ہے۔ حالانکہ اگلے 24 گھنٹوں میں موسم بدلنے کا اندازہ لگایا گیا ہے۔ مغربی ہمالیائی علاقے میں فعال ہو رہے ویسٹرن ڈسٹربینس سے کم سے کم درجہ حرارت 3 سے 5 ڈگری سیلسیس تک گرنے کا امکان ہے۔
