عظمیٰ نیوز ڈیسک
نئی دہلی//دہلی این سی آر میں زہریلی ہوائوں کا قہر جاری ہے، جس سے لوگ دم گھٹنے والی فضا میں زندگی گزارنے پر مجبور ہیں۔ فی الحال انہیں کسی قسم کی راحت کی امید نظر نہیں آ رہی۔ منگل کی صبح بھی کئی علاقوں میں ایئر کوالٹی انڈیکس (اے کیو آئی) انتہائی سنگین زمرے میں درج کیا گیا۔ سی این کے مطابق، نوئیڈا-125 میں صبح تقریبا 7 بجے اے کیو آئی 954 تک پہنچ گیا، جبکہ نوئیڈا-116 کا اے کیو آئی 961 ریکارڈ کیا گیا۔نوئیڈا کی بہ نسبت دہلی کے علاقوں میں حالات کچھ بہتر نظر آئے۔ یہاں آنند وہار کا اے کیو آئی 315، روہنی کا 284، پنجابی باغ کا 279، سونیا وِہار کا 249، وزیر پور کا 268، شری نواس کا 222 اور آر کے پورم کا 214 ریکارڈ کیا گیا۔مرکزی آلودگی کنٹرول بورڈ (سی پی سی بی) کیمطابق 3 سے 5 دسمبر تک اے کیو آئی خراب حالت میں رہے گا۔ اس کے بعد اگلے 6 دنوں تک یہ خراب سے انتہائی خراب سطح پر پہنچ سکتا ہے۔ پیر کو ہوائیں شمال مغربی سمت سے آئیں جن کی رفتار 8 کلومیٹر فی گھنٹہ سے کم رہی۔ منگل کو یہ رفتار 12 کلومیٹر فی گھنٹہ کے قریب پہنچ سکتی ہے۔ 4 دسمبر کو ہواوں کی رفتار صبح کے وقت 8 کلومیٹر فی گھنٹہ اور دوپہر کیو قت 12 سے 16 کلومیٹر فی گھنتہ اور 5 دسمبر کو 10 سے 12 کلومیٹر فی گھنٹہ تک رہے گی۔ آلودگی کنٹرول بورڈ کے افسروں کا کہنا ہے کہ ہوا کی رفتار بڑھنے سے آلودگی کے ذرات اڑ جاتے ہیں جس سے آلودگی میں کمی آتی ہے۔موسم کی پیش گوئی کرنے والی ایجنسی اسکائی میٹ کے مطابق شمالی میدانی علاقوں میں ہوا کی رفتار بڑھنے کی وجہ سے دہلی اور این سی آر میں آلودگی کی سطح میں سدھار ہونے کی امید ہے۔ حالانکہ درجہ حرارت میں معمولی اضافہ دیکھنے کو مل سکتا ہے۔
