عظمیٰ نیوز سروس
نئی دہلی//دہلی این سی آر سمیت شمالی ہند میں بارش کا دور جاری ہے۔ محکمہ موسمیات کے مطابق منگل کو بھی دہلی میں جھما جھم بارش کا امکان ہے۔ 18 جولائی تک ہلکی سے درمیانی بارش کا سلسلہ جاری رہنے والا ہے۔ وہیں اتر پردیش، بہار، ہماچل پردیش، اتراکھنڈ، راجستھان، مدھیہ پردیش میں بھی شدید بارش کو لے کر وارننگ جاری کی گئی ہے۔ اتر پردیش کے 13 ضلعوں میں آج بھاری بارش کو لے کر الرٹ کیا گیا ہے۔محکمہ موسمیات نے بہرائچ، بلرام پور، گونڈا، اعظم گڑھ، جونپور، مہاراج گنج، وارانسی، چندولی، مرزا پور، امبیڈکر نگر، پریاگ راج، بلیا میں شدید بارش کا امکان ظاہر کیا ہے۔ جبکہ بہار کے آرہ، پٹنہ، نالندہ، لکھی سرائے، جموئی، اورنگ آباد میں بھی جھما جھم بارش ہو سکتی ہے۔پہاڑی ریاستوں میں بھی مسلسل بارش ہو رہی ہے، جس کی وجہ سے عام زندگی بری طرح متاثر ہوئی ہے۔ ہماچل پردیش میں 17 جولائی تک بارش کا سلسلہ جاری رہنے والا ہے۔ وہیں منڈی، شملہ اور سولن ضلع میں بارش کو لے کر یلو الرٹ جاری کیا گیا ہے۔ اترا کھنڈ کے دہرہ دون، باگیشور اور نینی تال میں شدید بارش کا آرینج الرٹ جاری ہے۔ اس کے علاوہ ریاست کے دوسرے ضلعوں میں بھی ہلکی بارش ہونے کا امکان ہے۔مدھیہ پردیش میں آج موسم میں تبدیلی آ سکتی ہے۔ ریاست کے کئی ضلعوں میں بارش کے آثار ہیں۔ کچھ مقامات پر درجہ حرارت معمول سے تھوڑا کم رہ سکتا ہے، جس کی وجہ سے اومس بھی بنے رہے گی۔ راجستھان کے موسم کی بات کی جائے تو محکمہ موسمیات نے یہاں کوٹا، جئے پور، اجمیر اور جودھپور ڈویژن کے ضلعوں میں بارش کا ریڈ الرٹ جاری کیا ہے۔ 13 سے 15 جولائی کے دوران کونکن اور گوا میں الگ الگ مقامات، گجرات، وسطی مہاراشٹر کے گھاٹ علاقوں میں بہت بھاری بارش ہونے کی امید ہے۔اگلے 7دنوں تک شمال مشرقی ہند میں کئی مقامات پر گرج اور بجلی کڑکنے کے ساتھ ہلکی بارش ہونے کا امکان ہے۔ 18-13 جولائی کے دوران آسام اور میگھالیہ، ناگالینڈ، منی پور، میزورم اور اروناچل پردیش، تریپورہ میں کچھ مقامات پر شدید بارش ہو سکتی ہے۔
