عظمیٰ نیوز ڈیسک
نئی دہلی//مودی نگر کے بھوجپور تھانہ علاقے میں دہلی میرٹھ ایکسپریس وے پر بدھ کو صبح گھنے کہرے کی وجہ سے بڑا حادثہ پیش آیا ہے۔ حادثے میں تقریبا 25 گاڑیاں آپس میں ٹکرا گئیں، جس میں نصف درجن سے زیادہ افراد کے زخمی ہونے کی خبر ہے۔ اس میں کئی لوگوں کی حالت سنگین بنی ہوئی ہے۔ ابھی تک کسی موت کی تصدیق نہیں ہوئی ہے۔ ذرائع کے مطابق گھنے کہرے کی وجہ سے حد نگاہ کافی کم ہو گئی تھی جس کی وجہ سے سبھی گاڑیاں یکے بعد دیگرے ایک دوسرے سے ٹکراتی ہوئی چلی گئیں۔ حالانکہ گاڑیوں کی رفتار کم تھی لیکن اچانک ہوئی ٹکر سے حالات قابو سے باہر ہو گئے۔ ٹکر میں شامل گاڑیوں میں کاریں، ٹرک اور دیگر گاڑیاں شامل ہیں۔ حادثے کے بعد پولیس اور بچاو ٹیم موقع پر پہنچی اور زخمیوں کو ایمبولنس کے ذریعہ ہسپتال بھیجنے کی کارروائی کی۔ حادثے کے بعد دہلی میرٹھ ایکسپریس وے پر کئی کلومیٹر
لمبا جام لگ گیا جس سے مسافروں کو کافی پریشانی کا سامنا کرنا پڑا۔ پولیس نے حادثہ کی شکار گاڑیوں کو موقع سے ہٹانے کا کام شروع کیا۔ اس دوران ٹریفک دھیمی رفتار سے چلتی رہی۔ واضح ہو کہ دہلی-میرٹھ ایکسپریس وے (ڈی ایم ای)پر ضابطوں پر عمل نہیں کیے جانے سے آئے دن حادثے ہوتے رہتے ہیں۔
