عظمیٰ نیوز سروس
نئی دہلی//دہلی میں جمنا ندی کی آبی سطح منگل کی صبح خطرے کے نشان سے تین فٹ اوپر پہنچ گئی۔سنٹرل واٹر کمیشن کے اعداد و شمار کے مطابق دہلی کے پرانے ریلوے پل پر جمنا کی پانی کی سطح آج صبح 6 بجے 205.68 میٹر ریکارڈ کی گئی اور اس میں مسلسل اضافہ ہو رہا ہے ۔ یہاں خطرے کا نشان 205.33 میٹر ہے ۔دہلی اور آس پاس کے علاقوں میں پیر کو ہوئی موسلادھار بارش اور ہریانہ کے ہتھینی کنڈ بیراج سے مسلسل بڑی مقدار میں پانی چھوڑنے کی وجہ سے قومی راجدھانی میں یہ صورتحال پیدا ہوئی ہے ۔پہاڑی علاقوں میں موسلادھار بارش کی وجہ سے جمنا نگر ضلع میں واقع ہتھینی کنڈ بیراج سے ہزاروں کیوسک پانی چھوڑا جا رہا ہے ۔جمنا کی بڑھتی ہوئی آبی سطح کے درمیان، دہلی میں انتظامیہ نے ریسکیو ٹیم اور دیگر متعلقہ ایجنسیوں کو اسٹینڈ بائی موڈ پر رکھا ہے ۔ لوگوں سے اپیل کی جارہی ہے کہ وہ جمنا کے کنارے نہ جائیں اور انتظامیہ کی ہدایات پر عمل کریں۔ نشیبی علاقوں میں رہنے والے لوگوں کو ان علاقوں کو خالی کرنے کی تنبیہ کی جا رہی ہے ۔واضح رہے کہ جمنا میں اب تک سب سے زیادہ پانی کی سطح 208.66 میٹر ہے جو 13 جولائی 2023 کو ریکارڈ کی گئی تھی۔بارش کی وجہ سے گروگرام میں کئی بڑی سڑکوں پر طویل جام رہا، جس کی وجہ سے لوگوں کو اپنی منزل تک پہنچنے میں کئی گھنٹے کی تاخیر کا سامنا کرنا پڑا۔ دہلی جے پور ہائی وے پرافکوچوک پر زبردست جام تھا۔ پیک اوقات یعنی جس وقت سب سے زیادہ ٹریفک رہتا ہے اس وقت مسلسل بارش کی وجہ سے کافی طویل جام ہوگیا۔ سینکڑوں گاڑیاں ایک جگہ کھڑی نظر آئیں یا بہت آہستہ چلتی نظر آئیں۔بارش سے لوگوں کو گرمی سے راحت ملی ہے۔ لیکن وہ ٹریفک کے نظام سے پریشان ہو گئے۔ کئی علاقوں میں سڑکیں چار فٹ تک پانی سے بھر گئیں۔ ہفتے کے پہلے دن یعنی پیر کو عموماً افکوچوک پر گاڑیوں کی تعداد میں اضافہ ہوتا ہے۔ آدھے گھنٹے کے سفر میں لوگوں کو تین سے چار گھنٹے لگ گئے۔ دہلی سے گروگرام کے راستے میں بہت بڑا جام تھا۔ لوگ گھنٹوں ٹریفک میں پھنسے رہے۔
