دورہ ویسٹ انڈیز کیلئے پاکستانی ٹیموں کا اعلان

لاہور//پاکستان کرکٹ بورڈ نے لیگ سپنر شاداب خان اور بیٹسمین فخر زمان کو ویسٹ انڈیز کے دورے کے لئے پاکستان کے ونڈے اور ٹی ٹوئنٹی سکواڈ ٹیم میں شامل کر لیا ہے۔دو دیگر نئے کھلاڑی آصف ذاکر اور فہیم اشرف بھی ونڈے ٹیم میں شامل کئے گئے ہیں لیکن سابق کپتان اظہر علی کو ونڈے ٹیم میں شامل نہیں کیا گیا ہے۔سلیکٹرز نے بدھ کو جن دو ٹیموں کا اعلان کیا ہے ان میں کامران اکمل بھی شامل ہیں جو آخری بار تین سال قبل بنگلہ دیش میں ہونے والے آئی سی سی ورلڈ ٹی ٹوئنٹی میں کھیلے تھے۔ڈسپلن کی خلاف ورزی پر ٹیم سے باہر احمد شہزاد کو بھی ٹی ٹوئنٹی ٹیم میں شامل کیا گیا ہے۔انھوں نے گذشتہ سال انڈیا میں ہونے والے آئی سی سی ورلڈ ٹوئنٹی 20میں آخری بار پاکستان کی نمائندگی کی تھی۔18 سالہ شاداب خان کو فرسٹ کلاس شروع کیے ابھی ایک سال بھی نہیں ہوا لیکن اس مختصر سے وقت میں وہ ایک باصلاحیت آل راؤنڈر کی حیثیت سے سامنے آئے ہیں۔انھوں نے پاکستان اے کی جانب سے انگلینڈ اور زمبابوے کے دوروں میں عمدہ کارکردگی کا مظاہرہ کیا تھا۔انھوں نے حالیہ پاکستان سپر لیگ میں اسلام آباد یونائیٹڈ کی جانب سے کھیلتے ہوئے نو وکٹیں حاصل کی تھیں۔26 سالہ فخر زمان نے اگرچہ پاکستان سپر لیگ میں صرف ایک نصف سنچری سکور کی لیکن وہ ڈومیسٹک کرکٹ اور پاکستان اے کی جانب سے متاثر کن کارکردگی کا مظاہرہ کرتے آ رہے ہیں۔وکٹ کیپر بیٹسمین کامران اکمل نے پاکستان سپر لیگ میں ایک سنچری اور دو نصف سنچریوں کی مدد سے 355 رنز بنائے تھے وہ لیگ کے سب سے کامیاب بیٹسمین بھی قرار پائے تھے۔احمد شہزاد نے بھی پی ایس ایل میں عمدہ کارکردگی کا مظاہرہ کرتے ہوئے تین نصف سنچریوں کی مدد سے 242 رنز بنائے تھے۔فاسٹ بولر محمد عامر کو آرام دینے کی غرض سے ٹوئنٹی 20ٹیم میں شامل نہیں کیا گیا ہے تاہم وہ ونڈے سکواڈ کا حصہ ہیں۔عمراکمل کو کسی بھی ٹیم میں شامل نہیں کیا گیا ہے۔پاکستان اور ویسٹ انڈیز کے درمیان چار ٹی ٹوئنٹی انٹرنیشنل میچز چھبیس ، تیس مارچ یکم اور دو اپریل کو کھیلیجائیں گے۔ون ڈے سیریز کے تین میچز سات نو اور گیارہ اپریل کو ہوں گے۔پاکستان کی ون ڈے ٹیم میں یہ کھلاڑی شامل ہیں۔ سرفراز احمد (کپتان)، احمد شہزاد، فخرزمان، محمد حفیظ، بابراعظم، شعیب ملک، عماد وسیم، کامران اکمل، محمد عامر، وہاب ریاض، حسن علی، آصف ذاکر، فہیم اشرف، جنید خان، محمد اصغر اور شاداب خان ۔ جبکہ ٹوئنٹی 20ٹیم ان کھلاڑیوں پر مشتمل ہے۔ سرفرازاحمد (کپتان)، احمد شہزاد، محمد حفیظ، کامران اکمل، فخر زمان، بابراعظم، شعیب ملک، عماد وسیم، محمد نواز، شاداب خان، رومان رئیس، وہاب ریاض، حسن علی، عثمان شنواری اور سہیل تنویر۔