دوبئی پوٹس کی ٹیم عنقریب سرینگر میں وارد ہوگی

جموں //خزانہ کے وزیر ڈاکٹر حسیب اے درابو نے کل کہا ہے کہ ریاستی حکومت اور دوبئی پوٹس ورلڈ کی طرف سے سرینگر اور جموں میں مشترکہ طور قائم کئے جانے والے ڈرائی پوٹس سے مقامی اقتصادیات کے معیار اور ڈھانچے کو بڑھاوا دینے میں مدد گا ر ثابت ہوگا۔دوبئی سے لوٹنے کے بعد جموںمیں ذرائع ابلاغ کے نمائندوں کے ساتھ بات کرتے ہوئے ڈاکٹر درابونے مجوزہ ملٹی موڈل لاجسٹک پارکس مقامی پیداوار کو پروسسنگ مراکز اور پھر بیرون ریاست بازاروں تک پہنچانے میں مدد کریں گے۔انہوںنے کہا کہ ا سے کسانوں ، صنعتکاروں اور تاجروں کی آمدن میں اضافہ ہوگا اور روزگار کے کافی مواقع بھی پیدا ہوں گے۔ڈاکٹر درابو نے ریاستی حکومت کی طرف سے کل ابو دابی میں دوبئی پوٹس چیئرمین اور سی ای او سلطان احمد بن سلائیم کے ساتھ وزیر اعظم نریندر مودی اور ابو دابی کے شہزادہ محمد بن زائد النیہان کے ساتھ مفاہمت نامے پر دستخط کئے تاکہ ریاست میں براہ راست سرمایہ کاری کے ذریعے سے اپنے نوعیت کے پہلے ملٹی موڈل لاجسٹک پارک قائم کئے جاسکیں۔وزیر خزانہ نے کہاکہ ملٹی موڈل لاجسٹک پارک جیسا کہ اس کے نام سے ظاہر ہوتا ہے کہ ایک مرکزی مقام ہوگاجس میں تجارت پیشہ افراد کے لئے تمام سہولیات دستیاب ہوں گے ۔انہوںنے کہاکہ دوبئی پوٹس کی ٹیم عنقریب سرینگر میں وارد ہوگی تاکہ اس اہم پروجیکٹ پر کام باضابطہ طور سے کام شروع کیا جاسکے۔انہوںنے کہاکہ خوش آئند بات ہے کہ ریاستی حکومت کو ا س پروجیکٹ میں سرمایہ کاری کے لئے مختلف ملٹی نیشنل کمپنیوں کی پیش کش مل رہی ہے ۔ ڈاکٹر درابو نے کہا کہ پہلے مرحلے میں دوبئی پوٹس کی طرف سے 1500 کی سرمایہ کاری ہوگی جبکہ اگلے پانچ برسوں کے دوران یہ سرمایہ کاری پانچ ہزار کروڑ روپے تک بڑھ جائے گی۔انہوں نے کہاکہ مجوزہ ان لینڈ لاجسٹک پارکس سانبہ جموں اور اومپورہ کشمیر میں قائم کئے جائیں گے جہاں زراعت ، باغبانی ، دستکاری اور دیگر اشیاء کو محفوظ رکھنے کے علاوہ اس سے براہ راستہ بازاروں تک پہنچانے کی اختراعی سہولیات دستیاب ہوں گی ۔ اس اہم پروجیکٹ کے فوائد کا تفصیلی ذکر کرتے ہوئے کہا کہ وزیر خزانہ نے کہا کہ اس سے نہ صرف اشیاء کی ٹرانسپورٹیشن کے خرچے میں کمی آئے گی بلکہ اس اشیاء کو آسانی سے بازاروں تک پہنچانے میں بھی مدد ملے گی ۔انہوںنے کہا کہ ٹرانسپورٹیشن کے خرچے سے 20سے 25فیصد کمی لانے سے مقامی اقتصادیات کو دوام بخشنے میں مدد ملے گی۔ واضح رہے کہ سلطان احمد بن سلائیم نے دوبئی پوٹس کے اعلیٰ افسروں کی ایک ٹیم کے ہمراہ ریاست کا دورہ کر کے سرینگر اور جموں میں ان لاجسٹک پارکوں کے قیام کے خد وخال اور اس حوالے سے مفاہمت نامے کو حتمی شکل دینے پر تبادلہ خیال کیا تھا۔دوبئی پوٹس وفد نے وزیراعلیٰ محبوبہ مفتی ، وزیر خزانہ ڈاکٹر حسیب درابو ، صنعت و حرفت کے وزیر چندر پرکاش گنگا اور کئی دیگر ریاستی افسروں کے ساتھ ملاقات کی تھی۔انہوںنے سانبہ جموںمیں اس پارک کی مجوزہ جگہ کا بھی دورہ کیا تھا۔ یہ وفد اس سال موسم گرما کے دوران وادی کا دورہ کرے گی تاکہ کشمیر بالخصوص سرینگر بین الاقوامی ہوائی اڈے کے نزدیک اومپورہ میں اس پارک کی مجوزہ جگہ کو حتمی شکل دی جاسکے ۔