عظمیٰ نیوز سروس
نئی دہلی//دنیا کے 20سب سے آلودہ شہروں کی فہرست سامنے آ گئی ہے۔ اس فہرست میں اکیلے ہندوستان کے 13شہر شامل ہیں۔ ان میں بھی سب سے زیادہ آلودہ شہر میگھالیہ کا برنی ہاٹ ہے۔ آئی کیو ایئر کی طرف سے جاری رپورٹ کے مطابق دہلی دنیا کی سب سے آلودہ راجدھانی بنی ہوئی ہے۔ وہیں ملکوں کے لحاظ سے بات کریں تو ہندوستان دنیا کا 5واں سب سے آلودہ ملک ہے۔ یہ اعداد و شمار سال 2024 کو لے کر جاری کیا گیا ہے جبکہ 2023 میں ہندوستان تیسرے مقام پر تھا۔ اس طرح آلودگی کے معاملے میں معمولی سدھار آیا ہے۔ رپورٹ میں کہا گیا ہے کہ ہندوستان میں پی ایم 2.5 پارٹیکلس کی کثافت میں 7 فیصد تک کی کمی دیکھنے کو ملی ہے۔ وہیں ٹاپ-10 شہروں کی بات کریں تو اکیلے 6 ہندوستان میں ہی ہیں۔ہندوستان کے جن 13شہروں کو سب سے آلودہ مانا گیا ہے ان میں پنجاب سے لے کر میگھالیہ تک کے شہر ہیں۔ اس فہرست میں برنی ہاٹ پہلے نمبر پر ہے تو وہیں دہلی دوسرے مقام پر۔ اس کے علاوہ پنجاب کا ملان پور تیسرے مقام پر ہے۔ چوتھے پر فرید آباد ہے۔ پھر غازی آباد کے لونی، نئی دہلی، گرو گرام، گنگا نگر، گریٹر نوئیڈا، بھیواڑی، مظفر نگر، ہنومان گڑھ اور نوئیڈا کا نمبر آتا ہے۔ کل ملا کر ہندوستان کے 35 فیصد شہر ایسے ہیں جہاں پی ایم 2.5 کا لیول ڈبلیو ایچ او کی طرف سے تیار فہرست سے 10 گنا زیادہ ہے۔ عالمی صحت تنظیم کی لمٹ 5 مائیکروگرام فی کیوبک میٹر کی ہے۔رپورٹ کے مطابق ہندوستان میں فضائی آلودگی لگاتار تشویش کا باعث بنی ہوئی ہے اور یہ ایک بڑا صحت خطرہ بھی ہے۔ اس سے ہندوستان کے لوگوں کی زندگی کی عمر میں اوسطا 5.2 سال کی کمی آ رہی ہے۔ لینسیٹ ہیلتھ اسٹڈی کے مطابق 2009 سے 2019 تک ہونے والی 15 لاکھ اموات ایسی تھیں جن کی ایک وجہ ان کا پی ایم 2.5 آلودگی کے زیادہ رابطے میں رہنا تھا۔پی ایم 2.5کا مطلب ہوا میں پھیلے ان آلودگی والے ذرات سے ہوتا ہے جو پھیپھڑوں کو متاثر کرتے ہیں۔ اس سے سانس کے مسائل پیدا ہو سکتے ہیں۔ کئی مرتبہ دل کے امراض ہوتے ہیں اور کینسر تک کی وجہ بن سکتی ہے۔ رپورٹ میں دعوی کیا گیا ہے کہ گاڑیوں سے نکلنے والے دھوئیں، صنعتی اخراج اور فصلوں اور لکڑیوں کو جلانا فضائی آلودگی کے اہم عوامل ہیں۔
