عظمیٰ نیوز سروس
سرینگر// حکومت نے کشمیر کے مشہور ہینڈی کرافٹ وہینڈی لوم سیکٹر کے مفادات کے تحفظ کی یقین دِہانی کی ہے جو ورثہ دستکاری سے وابستہ لاکھوں کاریگروں کے ذریعہ معاش سے براہ راست منسلک ہے۔ایک سرکاری ترجمان نے جی ایس ٹی کونسل کی آئندہ میٹنگ میں ٹیکس سلیب کی مجوزہ نظر ثانی کے سلسلے میں میڈیا کے ایک حصے میں شائع ہونے والی کچھ رِپورٹوں کا جواب دیتے ہوئے آج واضح کیا کہ جموںوکشمیر یو ٹی حکومت نے پہلے ہی اِس معاملے کو مرکزی وزارتِ صنعت و حرفت کے ساتھ اُٹھایا ہے اور اِس میں جی ایس ٹی کی شرح کے ڈھانچے کو موجودہ 12 فیصد سے کم کرکے 5 فیصد کرنے کی درخواست کی ہے۔اِس میں 1000 روپے سے زیادہ قیمت کے شال بھی شامل ہیں جس کا مقصد کاریگروں سے چلنے والی اِس صنعت پر ٹیکس کا بوجھ کم کرنا اور مارکیٹ ایبلٹی کو سپورٹ کرنا ہے۔ترجمان نے دستکاری کو محنت پر مبنی صنعت قرار دیا جو اِنسانی اَفرادی قوت کا 80 فیصد ہے۔ اُنہوں نے مزید کہا کہ عالمی منڈیوں سے سخت مقابلے اور مشین سے تیار کردہ نقلوں کو مد نظر رکھتے ہوئے دستکاری شعبے کی بحالی کے لئے تمام ترکوششیں کی جائیں گی۔
