دربار کی منتقلی۔۔۔ بجلی کا حال کیا ہوگا؟

 بالآخر وہی ہوا، جس کا اندیشہ ظاہر کیا جارہا تھا۔ سول سکریٹریٹ کی جموں منتقلی کل شروع ہورہی ہے لیکن وادی کے طول و عرض میں بجلی کٹوتی کا سلسلہ پہلے ہی شروع کردیا گیا ہے، جس سے صارفین کے لئے پریشانیاں شروع ہوگئی ہیں اور یہ پریشانیاں آنے والے ایام میں کیا رُخ اختیار کریں اسکے بارے میں ابھی کچھ کہنا مشکل ہے، کیونکہ کٹوتی کا یہ سلسلہ بغیر کسی اعلانیہ شیڈیول کے اختیار کیا گیا ہے۔ گزشتہ برس بھی صورتحال اسی کے آس پاس رہی تھی اور دربار مُو کے ایک دن بعد ایسا کٹوتی شیڈول جاری کردیا گیا تھا جس کی رو سے اعلانیہ طور پر میٹر یافتہ اور غیر میٹر یافتہ علاقوں میںفی ہفتہ 21اور 42گھنٹوں کی کٹوتی کی گئی تھی تاہم عملی طور پر اس سے کہیں زیادہ کٹوتی دیکھنے کو ملی تھی۔ خاص کر صبح اور شام کے اوقات میں لوگوں کو بہت پریشانیوں کا سامنا کرنا پڑا تھا۔ اب کے کس نوعیت کا شیڈول سامنے آئے گا، اسکے بارے میں ابھی کچھ کہا نہیں جاسکتا  تاہم جس عنوان سے بغیر شیڈول کے کٹوتیاں شروع کردی گئی ہیں، اّس کے خلاف صارفین کا ردعمل سامنے آنے لگا ہے اور گزشتہ دنوں سے متعدد مقامات پر احتجاجی مظاہرے ہوئے ہیں۔ خاص کر شام کے وقت بجلی کی ترسیل بند ہونے سے لوگوں کو سخت مشکلات کا سامنا کرنا پڑتا ہے۔ جہاں تک عقل و فہم کا تقاضا ہے تو یہ ایسے اوقات ہیں جب صارفین کو بجلی کی سب سے زیادہ ضرورت ہوتی ہے۔شام کے وقت بجلی کا استعمال تو ویسے بھی عام ہے لیکن جب سردی کا موسم ہو تو صبح اور شام کے اوقات پر بجلی کی ضرورت اور زیادہ شدت کے ساتھ محسوس کی جاتی ہے۔اب اگر کسی شیڈول پر بھی عملدرآمد ہوتا بھی ہے تو بھی پھر بجلی کبھی کبھار درشن ہی دیتی ہے کیونکہ محکمہ بجلی کی یہ روایت رہی ہے کہ غیر اعلانیہ طور اس سے دوگنی کٹوتی کی جاتی ہے اور یوں عملی طور لوگوں کو اندھیروں میں دھکیل دیاجاتا ہے ۔محکمہ بجلی حسب روایت ہر سال ایک ہی عذر پیش کرتا آیا ہے ،یعنی بجلی کی طلب اور سپلائی میں وسیع خلیج ہے اور اس خلیج کو پاٹنے کیلئے کٹوتی ناگزیر بن جاتی ہے ۔محکمہ بجلی کے مطابق بجلی کی طلب بڑھ چکی ہے اور یہ طلب 1600میگاواٹ ہے جبکہ محکمہ کے پاس صرف1200میگاواٹ ہی بجلی فراہمی کے لئے ہوتی ہے اور یوں کٹوتی ناگزیر بن جاتی ہے۔قابل غور ہے کہ طلب اور سپلائی میں موجود اس خلیج کوپاٹنے کیلئے کٹوتی شیڈول میں غیر میٹر یافتہ صارفین زیادہ  نشانہ بنتے ہیں۔ 7لاکھ سے زائد بجلی صارفین میں سے 80فیصد کے قریب صارفین ایسے ہیں جو میٹریافتہ زمرے میں نہیں آتے تو اس کا مطلب ہے کہ سپلائی اور ڈیمانڈ کے درمیان موجود خلیج کو پُر کرنے کیلئے انہیں80 فیصد صارفین کو قربانی کا بکرا بنایا جاتا ہے۔ صارفین ،جو میٹر یا ایگریمنٹ کے تحت باضابطہ فیس اداکررہے ہیں ،ان کا حق بنتا ہے کہ انہیں بوقت ضرورت وافر مقدار میں بجلی فراہم کی جائے اور سرما سے زیادہ صارفین کو بجلی کی سب سے زیادہ ضرورت کب پڑ سکتی ہے۔مانا کہ بجلی کی چوری بھی ہوتی ہے تاہم وہ بجلی کہاں سے آتی ہے جو خاص الخاص افراد کیلئے چوبیسوں گھنٹے چالو رہتی ہے ۔کٹوتی شیڈول تو صرف عام لوگوں کیلئے ہے جبکہ وی آئی پی لائنیں ہمہ وقت چالو رہتی ہیںاور یوں کٹوتی شیڈول کا شکار صرف عام صارفین ہی بن جاتے ہیں جنہیں ارباب اختیار جموں روانہ ہوتے ہی سرما کے کٹھن موسم میں حالات کے رحم و کرم پر چھوڑ دیتے ہیں۔ بجلی بحران کیلئے خود محکمہ بجلی بھی کم ذمہ دار نہیںہے۔جہاں تک بجلی کے ترسیلی نظام کا تعلق ہے تو یہ حقیقت بھی کسی سے چھپی نہیں ہے کہ ریاست کو صرف ناقص ترسیلی شعبہ کی وجہ سے سالانہ کروڑ وںروپے کے خسارے سے دوچار ہونا پڑرہا ہے۔سروے کے مطابق بجلی کی ترسیل کے دوران بوسیدہ اور ناقص ترسیلی نظام کی وجہ سے اس وقت بھی55فیصد سے زائد بجلی ضائع ہورہی ہے۔مشاہدے میں آیا ہے کہ دیہی علاقوں میں جہاں بجلی ٹرانسفارمر انتہائی خستہ حالت میں ہوتے ہیں وہیں بجلی کھمبے اور ترسیلی لائنیں اس قدر بوسیدہ ہوتی ہیں کہ ہر وقت حادثہ کا احتمال رہنے کے علاوہ بجلی بھی مسلسل ضائع ہوتی رہتی ہے۔ایسے میں بجلی خسارے اور بجلی بحران کیلئے اکیلے صارفین کو ذمہ دار ٹھہرانا جائز نہیں ہے۔ صارفین پر الزام لگانے کی بجائے محکمہ بجلی کے حکام کو چاہئے کہ وہ اپنے محکمہ کامکمل پوسٹ مارٹم کریں۔اس ضمن میں جہاں محکمہ میں موجود افرادی قوت کو جوابدہ بنانا ناگزیر بن چکا ہے وہیں محکمہ کی مشینری اور ترسیلی نظام کو اپ گریڈ کرنا ضروری ہے۔جب بجلی شعبہ کی زبوں حالی کیلئے خود محکمہ ذمہ دار ہے تو محض بجلی چوری کا بہانہ بنا کر صارفین کو بجلی سے محروم نہیں رکھا جاسکتا۔ محکمہ بجلی کے حکام کو اپنے گریبان میں جھانک کر پہلے اپنی خامیوں کو سدھارنا چاہئے،اس کے بعد ہی صارفین کو مورد الزام ٹھہرایا جاسکتا ہے۔اگرریاستی حکومت اپنی ذمہ داریوں سے غفلت برت کر ہر سال بجلی کی کمی کا رونا روکر وادی کے سرما کو اندھیروں کے سپرد کرتی رہی تو ریاست میں تعمیر وترقی کے نقوش اُبھرنے کی اُمیدرکھنا عبث ہے اور چراغ تلے اندھیرا کے مصداق شمالی ہندوستان کی بیشتر ریاستوں کو روشن کرنے والی ریاست جموں و کشمیر کے عوام کی قسمت میں اندھیروں کے سوا کچھ نہیں ہوگا۔