جموں// 1872میں مہاراجہ رنبیر سنگھ کی طرف سے شروع کردہ دربار مؤ کی 144سالہ قدیم روایت کو برقرار رکھتے ہوئے ریاست میں نامساعدحالات کے بیچ سرمائی دارالحکومت جموں میں آج یعنی پیر سے دربارمؤسے منسلک سول سیکریٹریٹ سمیت تمام دفاتراپناکام کاج شروع کررہے ہیں۔انتظامیہ نے دربارموسے منسلک دفاترمیں کام کاج بحال کرنے کیلئے تمام ترتیاریاں مکمل کرلی ہیں ۔ دربارمو دفاتر کھلنے کے موقعہ پر ہربار کی طرح اس بار بھی وزیراعلیٰ کوسلامتی دستے رسمی طور پر سکریٹریٹ احاطے میں گارڈآف آنرپیش کریں گے۔اس کے بعد وزیراعلیٰ محبوبہ مفتی اخباری نامہ نگاروں کے ساتھ بات چیت بھی کریں گی۔ سرینگرمیں سول سیکریٹریٹ سمیت دربارموسے منسلک دفاتر27 اکتوبرکوبندہوئے تھے جوآج ایک ہفتے سے زائدوقفے کے بعدجموں میں دوبارہ کھل رہے ہیںاورباضابطہ طورپرکام کاج کاآغازکریں گے۔ڈائریکٹر اسٹیٹس غلام نبی ایتو نے کشمیر عظمیٰ کو بتایا کہ دربار مؤ کے سلسلہ میں تمام تر تیاریاں مکمل کر لی گئی ہیں ، سیکرٹریٹ اور دیگر عمارتوں کی تجدید و تزئین کر لی گئی۔ انہوں نے بتایا کہ مؤ ملازمین کیلئے ٹانگے والی گلی، پنج تیرتھی، بی سی روڈ ، جانی پور میں 3200رہائشی کوارٹر وں کے علاوہ نجی ہوٹلوں میں 800کمرے اور جے کے ٹی ڈی سی کی عمارت میں 110کمرے دستیاب رکھے گئے ہیں۔ افسران کے لئے 200مکانات بھی کرائے پر حاصل کئے گئے ہیں۔ ملازمین کی سیکورٹی کے لئے پہلی بار نجی سیکورٹی ایجنسی کی خدمات حاصل کی گئی ہیں جب کہ ملازمین کی گاڑیوں کو خصوصی پاس بھی جاری کرنے کا فیصلہ کیا گیا ہے تاکہ رہائشی کالونیوں میں کوئی بھی بیرونی گاڑی بلا اجازت داخل نہ ہوسکے ۔ سیکرٹریٹ کے اطراف و اکناف میں سیکورٹی بندوبست مزید سخت کر دیا گیا ہے ۔ حسب روایت شالیمار سے ڈوگرہ ہال روڈ کو بند کر دیا گیا ہے جب کہ قرب و جوار میں خصوصی ناکے نصب کئے گئے ہیں۔ ڈی آئی جی جموں اشکور وانی نے کشمیر عظمیٰ کو بتایا کہ دربار مؤ کے سلسلہ میں تمام تر انتظامات مکمل کر لئے گئے ہیں ، پولیس پوری طرح چوکس اور ہر قسم کے حالات کا مقابلہ کرنے کیلئے تیار ہے ۔اس سلسلے میں چندروزقبل ڈویژنل کمشنرجموں ڈاکٹرپون کوتوال نے سول سیکرٹریٹ کمپلیکس جموں کادورہ کر دربارموئوکے انتظامات کاجائزہ لیاتھا۔واضح رہے کہ سرینگرمیں دربارموسے منسلک دفاتربندہونے کے بعدانتظامیہ نے ریکارڈکی منتقلی کے عمل کاآغاز ایس آرٹی سی گاڑیوں کے ذریعے پولیس اور نیم فوجی دستوں کی نگرانی میں شروع کردیاتھا۔انتظامیہ نے دربارمودفاتربندہونے سے ایک ہفتہ پہلے ہی مقامی ملازمین کوبطورایڈوانس پارٹی جموں کیلئے روانہ کردیاتھا،اوربعدازاں سرینگرکے دربارموملازمین کوجموں پہنچانے کیلئے آسانیاں پیداکیں۔دربارموکے دفاترکھلنے کے پہلے روزہمیشہ حکومت کواحتجا جی مظاہروں کاسامناکرناپڑتاہے،حسب معمول امسال بھی دربارموئو کھلنے کے موقعہ پر حزب اختلاف جماعتوں اورمختلف ملازمین اورسماجی تنظیموں کی طرف سے مطالبات کولے کر سیکرٹریٹ گھیرائوکی کوشش کاقوی امکان ہے ۔
دربار مؤ کی 144سالہ روایت بر قرار ،جموں میں آج سجے گار دربار
