دباؤ میں آکر کھلاڑی خراب کارکردگی کا مظاہرہ نہ کریں :اسمتھ

کولکاتہ، 22ستمبر (یو این آئی) آسٹریلیائی کپتان اسٹیون اسمتھ نے ہندستانی ٹیم کے خلاف مسلسل دوسری شکست کے بعد کہا کہ ٹیم کے بلے بازوں نے دباؤ میں آکر خراب کارکردگی کا مظاہرہ کیا جو اس شکست کی وجہ بنا۔  آسٹریلیا کو جمعرات کوایڈن گارڈن میں ہندستان سے دوسرے یک روزہ میچ میں 50رنوں سے ہار گئی جس کے بعد میزبان ٹیم نے 0-2 سے سبقت حاصل کرلی۔ دونوں افتتاحی بلے ڈیوڈ وارنر اور ہلٹن کارٹ رائٹ ایک ایک رن پر آؤٹ ہئے اور بائیں ہاتھ اسپنر گیندباز کلدیپ یادو نے اس خراب بیٹنگ کا فائدہ اٹھاتے ہوئے ہیٹ ٹرک بنالی۔   عالمی چیمپیئن ٹیم اب پانچ میچوں کی سیریز میں پیچھے چل رہی ہے جو اس کی بیرون ملک مقابلوں میں لگاتار دسویں شکست بھی ہے ۔ کپتان اسمتھ نے 59 اور مارکس سٹوینس نے ناٹ آؤٹ 62 رن بنائے ، اور ٹیم کو 200کے اسکور تک پہنچادیا۔ میچ کے بعد کپتان نے کہا ''بلے بازوں نے بہت غلطیاں کی ہیں مجھے لگتا ہے کہ یہ کچھ زیادہ ہو رہا ہے اورسچ کہوں، یہ تمام فارمیٹس میں ہو رہا ہے ''۔   ا سمتھ نے کہا کہ "ہم نے بہت جلدی وکٹ گنوادیئے ہمیں اسے روکنا ہوگا۔ ہمارے کھلاڑیوں نے بہت مشق کی ہے اور اب وقت ہے جب وہ فیلڈ پر اپنی صلاحیتیں اجاگرکریں۔ جب آپ دباؤ میں ہوں تو گھبراکر مظاہرہ نہ کریں ۔ مجھے لگتا ہے کہ ہم نے پہلے ون ڈے میں بھی کچھ ایسا ہی کیا ہے اور اس میچ میں بھی بیوقوفانہ غلطیاں کردیں۔" آسٹریلیا کے آخری پانچ بلے بازوں نے صرف 10 رنز ہی بنائے جبکہ ٹاپ آرڈر کے بلے باز تو کلدیپ اور یجویندر چہل کی اسپن گیندوں کو سمجھ ہی نہیں سکے ۔کپتان نے کہا کہ یہاں بیٹھ کر یہ کہہ دینا کہ یہ روکنا ہوگا بہت آسان ہے لیکن جب ہم میدان پر ہوتے ہیں تو ہمیں اپنے اسٹائل کو تبدیل کرنا ہوگا کیونکہ ہم جانتے ہیں کہ اس سے کام نہیں ہو رہا ہے ۔ اپنے 100 ویں ون ڈے میں بھی ٹیم کو جیت نہیں دلا سکے اسمتھ نے کہا کہ گیند کو قریب سے دیکھنا یا گیند کو قریب سے دیکھتے ہوئے کھیل ہی بھول جانا مختلف باتیں ہیں۔کسی بھی ایک کھلاڑی پر انگلی اٹھانا آسان نہیں ہے ، لیکن جو کچھ بھی ہے ، اسے تبدیل کرنا ہوگا۔ہمیں دباؤ کے تحت درست فیصلہ کرنا ہوگا اور کھیل کو مناسب طریقے سے کھیلنا ہے ۔ مارکس اسٹوئنس نے آسٹریلیا کے لئے 65 گیندوں میں ناٹ آؤٹ 62 رنز کی بڑی اننگز کھیلی ۔ کپتان نے اسٹوئنس کی نصف سنچری اننگز کی تعریف کرتے ہوئے کہا کہ انہوں نے اس کارکردگی سے دکھا دیا کہ دباؤ میں کھلاڑیوں کو ہندوستانی گیند بازوں اور ان کنڈیشنز میں کیسا مظاہرہ کرنا چاہیے ۔ انہوں نے کہا کہ مارکس نے میدان پر کسی طرح کی الجھن نہیں دکھائی اور پچ پر زبردست اور یکسوئی کے ساتھ بہترین کرکٹ شاٹس کھیلے ۔ وہ بہت اچھا اور مثبت انداز میں کھیلتے رہے ۔ ہمیں اسی طرح کا کھلاڑی اپنے سرفہرست چار بلے بازوں میں چاہیے جو رن بنا سکے ۔ہندستان اور آسٹریلیا اتوار کو اپنا تیسرا ون ڈے کھیلنے اتریں گے جہاں مہمان ٹیم کے لیے سریز بچانے کے لحاظ سے کرو یا مرو کا میچ ھوگا۔یواین آئی