حسین محتشم
پونچھ//ضرورت مند مریضوں کی جان بچانے کے لئے اپنے خون کاعطیہ کرنے والے نوجوانوں کو اس نیک کام کے لئے سراہتے ہوئے چیف میڈیکل آفیسر پونچھ نے ان کو اپنے دفتر میں مدعو کر کے ان کی ستائش کی۔ اس دوران انہوں نے خون عطیہ کرنے کی مہم کو فروغ دینے اور ضلع میں صحت کی خدمات کو بہتر بنانے کے حوالے سے تبادلہ خیال کیا۔سیوریئرز بلڈ ڈونرز ٹیم جموں و کشمیر کے چیئرمین اعجاز صدیقی اور ان کی پوری ٹیم نے اس دورسن چیف میڈیکل آفیسر پونچھ کو یقین دلایا کہ وہ خون کے عطیات کی مہم کو مزید بہتر بنانے اور ضرورت مند افراد کے لئے خون کی دستیابی کو یقینی بنانے کی ہر ممکن کوشش کریں گے۔سی ای او نے رضاکارانہ خون عطیہ کرنے کے بارے میں آگاہی بڑھانے کی اہمیت پر زور دیا اور سماجی طور پر پسماندہ افراد کی مدد کرنے کے اپنے عزم کا اعادہ کیا۔ انہوں نے صحت کے حکام کے ساتھ ممکنہ تعاون پر بھی بات کی تاکہ مریضوں کو بروقت امداد فراہم کرنے کے عمل کو آسان بنایا جا سکے۔صدیقی نے کہا کہ سیوریئرز بلڈ ڈونرز ٹیم جموں و کشمیر کا یہ اقدام ان کی مسلسل کوششوں کی عکاسی کرتا ہے جو وہ خطے میں ایک صحت مند اور معاون کمیونٹی کے قیام کے لئے کر رہے ہیں۔اس موقع پر ٹرسٹ کے مرکزی اراکین سید ساحل بخاری، سید ساقب کرمانی، سردار ترنپریت سنگھ اور سید سجاد بھی موجود تھے۔ ان کی فعال شرکت نے خون کے عطیات کی مہم کو آگے بڑھانے اور خطے میں ضرورت مندوں کی مدد کرنے کے لیے ٹیم کے متحدہ عزم کو اجاگر کیا۔ اعجاز صدیقی اور گروپ ایڈوائزر ساحل بخاری نے چیف میڈیکل آفیسر پونچھ کو ٹرسٹ کی سرگرمیوں اور خون کے عطیات اور انسان دوست خدمات میں جاری کوششوں کے بارے میں آگاہ کیا۔ چیف میڈیکل آفیسر نے ٹرسٹ کے نیک کاموں کو سراہا اور ان کی آئندہ کوششوں کے لیے مکمل تعاون کی یقین دہانی کرائی۔ انہوں نے ٹیم کی سماجی فلاحی خدمات کو سراہتے ہوئے انہیں اپنی بے لوث خدمت جاری رکھنے کی ترغیب دی۔
