یو این آئی
نئی دہلی//وزیر اعظم نریندر مودی نے آئندہ مالی سال کے مرکزی بجٹ کو توقعات سے زیادہ ڈلیوری والا قراردیتے ہوئے منگل کو کہا کہ بہت سے ایسے شعبے ہیں جہاں ماہرین نے بھی جتنی توقعات کی تھیں، اس سے بڑھ کر اقدامات کئے گئے ہیں۔ مودی نے منگل کو بجٹ کے بعد کی ویبینار سیریز کی دوسری کڑی میں چھوٹے اور درمیانے درجے کی صنعتیں مینوفیکچرنگ ایکسپورٹ اور نیوکلیئر انرجی مشن جیسے موضوعات پر بات کی ۔ مینوفیکچرنگ اور برآمدات پر اس بجٹ ویبینار کو ہر لحاظ سے اہم قرار دیتے ہوئے انہوں نے کہا’’یہ بجٹ ہماری حکومت کی تیسری مدت کا پہلا مکمل بجٹ تھا۔ اس بجٹ کی سب سے خاص بات توقعات سے بڑھ کر ڈیلیوری تھی‘‘۔انہوں نے کہا کہ آج دنیا کا ہر ملک ہندوستان کے ساتھ اپنی اقتصادی شراکت داری کو مضبوط کرنا چاہتا ہے۔ ملک کے مینوفیکچرنگ سیکٹر کو اس شراکت داری سے زیادہ سے زیادہ فائدہ اٹھانے کے لیے آگے آنا چاہیے۔انہوں نے کہا’’ ہم نے خود انحصار ہندوستان کے وژن کو آگے بڑھایا ہے اور اپنی اصلاحات کی رفتار کو مزید تیز کیا ہے۔ ہماری کوششوں نے معیشت پر کووڈ کے اثرات کو کم کیا، جس سے ہندوستان کو تیزی سے ترقی کرنے والی معیشت بننے میں مدد ملی۔ مودی نے کہا کہ آج 14 شعبوں کو پروڈکٹیوٹی لنکڈ انسینٹیو اسکیم کا فائدہ مل رہا ہے۔ اس اسکیم کے تحت 7.5 کروڑ یونٹ منظور کیے گئے ہیں۔ اس سے 1.5 لاکھ کروڑ روپے سے زیادہ کی سرمایہ کاری، 13 لاکھ کروڑ روپے سے زیادہ کی پیداوار اور 5 لاکھ کروڑ روپے سے زیادہ کی برآمدات ہوئی ہیں۔انہوں نے کہا کہ تحقیق اور ترقی نے ہندوستان کے مینوفیکچرنگ سفر میں اہم رول ادا کیا ہے اسے اور آگے لے جانے اور تیز کرنے کی ضرورت ہے۔ تحقیق اور ترقی کے ذریعہ جدید مصنوعات پر فوکس کیا جاسکتا ہے، نیز مصنوعات میں ویلیو ایڈیشن بھی ہوسکتا ہے۔
وزیر اعظم نے کہا، “2020 میں، ہم نے ایم ایس ایم ای کی تعریف پر نظر ثانی کی۔ یہ 14 سال بعد کیا گیا تھا۔ اس سے یہ خدشہ ختم ہو گیا کہ بڑھتے ہوئے کاروبار سے حکومتی فوائد حاصل نہیں ہوسکیں گے۔ اس کے نتیجے میں، ایم ایس ایم ای کی تعداد چھ کروڑ سے زیادہ ہو گئی ہے، جس سے کروڑوں ہندوستانیوں کو روزگار مل رہا ہے۔ اس سال کے بجٹ میں، ہم نے ایم ایس ایم ای کی توسیع کو یقینی بنانے کے لیے تعریف میں مزید ترمیم کی۔قرض کی تقسیم کے لیے نئے طریقے اپنانے کی ضرورت کی طرف اشارہ کرتے ہوئے، مسٹر مودی نے کہا کہ اس سیایم ایس ایم ای کو کم لاگت اور وقت پر قرض مل سکے گا۔ پہلی بار پانچ لاکھ خواتین کاروباریوں اور ایس سی اور ایس ٹی کاروباریوں کو 2 کروڑ روپے تک کا قرض دیا جائے گا۔ انہیں نہ صرف قرضوں کی ضرورت ہے بلکہ رہنمائی کی بھی ضرورت ہے۔ صنعتوں کو ان کی مدد کے لیے رہنمائی کے پروگرام شروع کرنے چاہئیں۔