عظمیٰ ویب ڈیسک
طبی ماہرین کا کہنا ہے کہ اگر ذرا سا چلنے کے سبب سانس پھولنے لگے اور کچھ بھی کام کیے بغیر تھکان کا احساس رہے تو ہوشیار ہو جائیں! یہ انیمیا کی علامت میں سے چند علامتیں ہیں۔ایک نئی تحقیق کے مطابق ہمارے ملک بھارت میں 57فیصد خواتین ’انیمیا‘ کا شکار ہیں۔
طبی ماہرین کا کہنا ہے کہ خواتین کی جانب سے تھکن، کمزوری، آنکھوں کے آگے اندھیرا سا آجانا، دل کا بہت تیزی سے دھڑکنا، ہاتھ پاؤں میں سنناہٹ اور بخار محسوس ہونا عام شکایتیں ہیں جن میں دن بہ دن اضافہ ہوتا چلا جا رہا ہے۔طبی ماہرین کا کہنا ہے کہ درج بالا جملے زیادہ تر حاملہ خواتین کی جانب سے سننے کو ملتے ہیں جس کی ایک اور واحد وجہ خون کی کمی، یعنی کہ انیمیا (Anemia) ہے۔
ماہرین کا کہنا ہے کہ انیمیا جسم میں صحت مند سرخ خون کے ذرّات کی کمی کو کہا جاتا ہے، یہ ہیموگلوبن کی کمی بھی کہلاتی ہے۔طبی ماہرین کے مطابق خون میں سرخ خلیات کی کمی ہمارے جسم کے نظام کو متاثر کرتی ہے، یہ خلیات ہمارے جسم میں آکسیجن کی فراہمی کا کام کرتے ہیں، سرخ خلیات ہماری ہڈیوں کے گودے یا بون میرو میں پیدا ہوتے ہیں، ایک خلیہ 120 دن زندہ رہتا ہے اور پھر ختم ہو جاتا ہے۔
طبی ماہرین کا کہنا ہے کہ انیمیا کی کئی اقسام اور وجوہات ہیں جیسے کہ:
آئرن یا فولادکی کمی۔
Anemia Megaloblastic ۔یہ وٹامن بی 12اور فولیٹ یافولک ایسڈ کی کمی کی وجہ سے ہو تی ہے۔
Anemia Haemolytic ۔ اس میں خون کے سرخ ذرّات ٹوٹ جاتے ہیں۔
Diseases Chronicیعنی دائمی بیماریاں جیسے گردے یا دل کے امراض آرتھرائٹس اور کینسر جیسے امراض۔
Diseases Inherited یعنی موروثی بیماریاں جیسے تھیلیسیمیا اور آٹوامیون بیماریاں۔
وائرل انفیکشنز ( infections Viral)
ان تمام اقسام میں فولادکی کمی سے ہونے والےAnemia Iron Deficiencyکا تناسب سب سیزیادہ ہے، خصوصاً حاملہ خواتین میں۔ ہیموگلوبن کی نارمل مقدار مردوں میں 13.8سے 17.2gm/dlجبکہ عورتوں میں 12.1سے15.gm/dl، بچوں میں 11سے16gm/dlاورحاملہ خواتین میں 11سے15.1gm/dl ہوتی ہے۔
ماہرین کا کہنا ہے کہ عورتوں میں انیمیا کا تناسب زیادہ ہوتا ہے۔ہمارے ملک بھارت میں انیمیا کے پھیلائو کی بات کریں تو 57فی صد عورتیں انیمیا کا شکار ہیں جن میں زیادہ تعداد حاملہ خواتین کی ہے۔
انیمیا کی علامات
انیمیا کی علامات کی بات کی جائے تو کمزوری، تھکن، سردرد، بھوک نہ لگنا، سانس پھولنا، ہاتھوں پیروں کا سن ہونا یا سنناہٹ محسوس ہونا، طبیعت میں چڑچڑاپن کی شکایت خون کی شدید کمی کی علامت ہے۔اس کے علاوہ جِلد کا پیلا پڑ جانا، منہ اور زبان پر چھالے ہونا، چکرآنا، ناخنوں کا ٹوٹنا، بالوں کا جھڑنا اور جِلد کی خشکی بھی شامل ہے۔
دوسری جانب اگر حاملہ خواتین کو خون کی کمی کا سامنا ہو تو مشکلات میں مزید اضافہ ہو جاتا ہے۔ماہرین کا بتانا ہے کہ خون کی کمی کا شکار حاملہ عورتوں کے بچے کم وزن پیدا ہوتے ہیں، خون کی کمی کا شکار ماؤں میں انفیکشن ہونے کا امکان بھی بہت زیادہ ہوتا ہے کیوں کہ ان کامدافعت کا نظام کمزور ہوتا ہے۔
انیمیا کا عاج
جہاں تک خون کی کمی کے علاج کا تعلق ہے تو اگر خواتین اپنی غذا پر توجہ دیں تو ان میں انیمیا کا امکان خاصا کم ہو سکتا۔ماہرین کی جانب سے تجویز کیا جاتا ہے کہ خواتین کو چاہیے کہ وہ ایسی صحت مند غذا کا استعمال کریں جو فولاد سے بھرپور ہو، مثلاً! ہری سبزیاں، پالک، میتھی، گاجر، چقندر، ٹماٹر، دالوں میں تقریباً ساری دالیں اور سرخ لوبیا، انڈے، گوشت، کلیجی، مچھلی وغیرہ۔
خواتین کے لیے خشک میوہ جات اور بیج بھی بے حد مفید ثابت ہوتے ہیں کیوں کہ اِن میں ان میں فولاد کی خاصی مقدار پائی جاتی ہے۔طبی ماہرین کی جانب سے حاملہ خواتین کے لیے تجویز کیا جاتا ہے کہ فولاد والی غذاؤں کے ساتھ دودھ، دہی اور پانی زیادہ مقدار میں جبکہ کافی اور چائے کا استعمال کم کرنا چاہیے۔
حاملہ خواتین کو انیمیا سے بچاؤ کے لیے اپنا باقاعدگی سے چیک اَپ کروانا چاہیے تاکہ خون کی کمی کے ساتھ ساتھ ان کا بلڈ پریشر اور شوگر بھی چیک ہو سکے۔ انہیں ڈاکٹر کے مشورے سے واک یا ہلکی پھلکی ورزش بھی کرنی چاہیے۔ ڈاکٹر کی تجویز کردہ دوائیں جن میں آئرن بی 12، ملٹی وٹامن اور کیلشیم وغیرہ شامل ہو ضرور لینا چاہئیں۔
یاد رکھیں ایک صحت مند عورت اور صحت مند ماں ہی ایک صحت مند معاشرے اور بچے کو جنم دے سکتی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
