اشتیاق ملک
کشتواڑ+ڈوڈہ//نیشنل کانفرنس کے صدر ڈاکٹر فاروق عبداللہ نے کشتواڑ میں جموں کشمیر کے حقوق کی واپسی اور فوری انتخابات کی وکالت کی۔کشتواڑ میں پارٹی ہیڈ کواٹر پر کارکنوں سے خطاب کرتے ہوئے نیشنل کانفرنس کے صدر ڈاکٹر عبداللہ نے اتوار کو کہا کہ انکی جماعت روز اول سے ہی جموں کشمیر و لداخ کے لوگوں کی خوشحالی،ترقی،فارغ البالی او عزت و امن کی زندگی کی خواہاں رہی ہے۔ان کا کہنا تھا کہ اس جماعت نے جموں کشمیر کے لوگوں کو آئینی وجمہوری حقوق کے ساتھ ساتھ اظہار رائے دہی کا حق دیا جبکہ نیشنل کانفرنس کی مالی و جانی قربانیوں کی بدولت ہی جموں کشمیر کے وحدت و انفرادیت اور بھائی چارے کی مشعل فروزاں رہی ہے۔ انہوں نے کہا کہ نیشنل کانفرنس کی تحریک انصاف پر مبنی اور نا انصافی کے خلاف رہی ہے او جموں کشمیر کے عوام آج بھی پورے عزم کے ساتھ جموں کشمیر کے خصوصی درجے کی واپسی اور اسمبلی انتخابات کیلئے پر امید ہے کیونکہ جموں کشمیر کی عوام گزشتہ دس سال سے عوامی نمائندہ سرکار سے محروم ہے۔انہوں نے کہا ’’طاقت کے بلبوتے پر جموں کشمیر کے لوگوں کے حقوق چھین لئے گئے ہیں جو کہ جمہوریت کیلئے ایک کاری ضرب کے برابر ہے‘‘ ۔اس موقعہ پر پارٹی کے سنیئر لیڈران سجاد احمد کچلو، رتن لعل گپتا،سجاد شاہین اور دیگر لیڈراں نے بھی خطاب کرتے ہوئے عوام پر زور دیا کہ وہ پارٹی کو مظبوط بنائیں اور عوامی مسائل کے ازالے کیلئے پیش پیش رہیں۔دریں اثناء ڈاکٹر فاروق عبداللہ خطہ چناب کے دورے کے تیسرے روز ڈوڈہ ضلع کا دورہ کریں گے۔ اس دوران وہ مختلف علاقوں میں پارٹی کارکنوں و عوامی وفود سے ملاقات کرکے تنظیمی و دیگر مسائل کا بھی جائزہ لیں گے۔پارٹی ذرائع کے مطابق ڈاکٹر فاروق عبداللہ آج کشتواڑ سے اسمبلی حلقہ ڈوڈہ کے بلاک جکیاس، کاہرہ و ٹھاٹھری کا دورہ کریں گے اور واپسی پر ڈوڈہ و بھدرواہ میں بھی پارٹی کارکنوں سے خطاب کریں گے.
