سی این آئی
سرینگر //پیر پنچال کے آر پار ہوئی برفباری کے بعد خشک سبزیوں کی نرخوں میں بے تحاشا اضافہ ہوا ہے اور سبزی فروش اپنے من مانی قیمتوں پر ان چیزوں کو فروخت کرتے ہیں ۔ وادی کشمیر میں کڑاکے کی سردی نے جہاں عام لوگوں کی زندگی اجیرن بنادی ہے وہیں دوسری طرف ناجائز منافع خوروںنے بھی لوگوں کو پریشان کرنا شروع کردیا ہے ۔ لوگوں نے الزام ہے کہ متعلقہ محکمہ ہاتھ پر ہاتھ دھرے بیٹھا ہے جس کی وجہ سے گراں بازاری عروج پر ہے اور دکاندار کھلے عام اپنے شرائط اور قیمتوں پر اشیاء کو فروخت کرتے ہیں ۔مہنگائی کا جن بوتل سے باہر آیا ہے جبکہ وادی میں سبزی اور میوہ فروشوں نے عام آدمی کو دو دو ہاتھوں سے لوٹنے کا سلسلہ شروع کیا ہے ۔انتظامیہ کی بے حسی کی وجہ سے گراں بازاری آسمان کو چھو رہی ہے اور سردی کے باوجود خریداروں کے پسینے چھوٹ رہے ہیں ۔لوگوں کے مطابق عام آدمی کے مہنگائی کے ساتھ نبردآزما ہونے کا آغاز ہوا ہے کیونکہ اشیاء ضروریہ کی قیمتوں میں ہوش رباء اضافہ ہونے کا سلسلہ چل پڑا ہے ۔ نمائندے کے مطابق محکمہ امور صارفین کی غفلت شعاری کے نتیجے میں سرینگر سمیت وادی کے دوسرے قصبہ جات میں دکانداروں نے لوٹ کھسوٹ کا بے تحاشا سلسلہ شروع کردیا ہے ۔شہر سرینگر میں سبزی و مرغ فروش صارفین کو دو دو ہاتھوں سے لوٹ رہے ہیں ۔لوگوںنے کہاکہ برفباری ہونے کے ساتھ ہی جہاں دیگر اشیاء ضروریہ کی چیزوں کی قیمتیں بڑھادی گئیں ہیںوہیں پر خشک سبزیوں کی نرخوں میں بھی کافی حد تک اضافہ کردیا گیا ہے ۔
