خبریں

جموں//پولیس نے ایک کیس میں ملوث مفرورشخص کوگرفتارکرکے عدالت میں پیش کیاہے۔ تفصیلات کے مطابق جانی پورپولیس سٹیشن کی ٹیم نے مفرورشخص رمیش کمارولد باری رام ساکن مٹھی جموں کوگرفتارکرکے اسے عدالت میں پیش کیا۔رمیش کمار ایف آئی آر نمبر 130/2016 ،زیردفعہ379/34RPCمیں ملوث تھااوراس کے خلاف کورٹ نےU/S 512 Cr.PCکے تحت وارنٹ بھی جاری کیاتھا۔پولیس نے یہ کارروائی ڈی ایس پی ہیڈکوارٹرجموں راج پال سنگھ اورایس پی سٹی نارتھ جموں ڈاکٹرونودکمارکی نگرانی میں عمل میں لائی گئی۔

 

جموں / سٹیٹ چیف انفارمیشن کمشنر خورشید احمد گنائی نے آج یہاں راج بھون میں گورنر این این ووہر اکے ساتھ ملاقات کی ۔انہوں نے گورنر کو کمیشن کے کام کاج کے بارے میں جانکاری دی۔اس دوران انہوں نے انتظامی نظام بالخصوص عوامی خدمات نظام میں مزید جواب دہی اور شفافیت پیدا کرنے کے لئے ممکنہ اقدامات کو بھی زیر بحث لایا۔ 

 

جموں / کھادی اینڈ ولیج انڈسٹریز بورڈ کے وائس چیئرمین منصور حسین سہر وردی نے لوگوں کو بورڈ کی سکیموں سے روشناس کرانے کے عمل میں شمالی ریاستوں میں پہلی پوزیشن حاصل کرنے کے لئے بورڈ کو مبارک باد دی ہے ۔جموں میں ایک جائزہ میٹنگ کی صدارت کرتے ہوئے انہوں نے افسروں پر زور دیا کہ وہ مزید تند ہی اور لگن کے ساتھ کام کر کے اہداف کو حاصل کرنے کے علاوہ لوگوں کو بورڈ کے پروگراموں اور سکیمو ں کے بارے میںجانکاری دی تاکہ زیادہ سے زیادہ لوگ بالخصوص نوجوان مستفید ہوسکیں۔سیکرٹری کے وی آئی بی رشید احمد قادری کے علاوہ کئی دیگر افسران بھی میٹنگ میں موجود تھے۔سہروردی نے کہا کہ بیداری پروگرام دور دراز علاقوں میں منعقد کئے جانے چاہئیں تاکہ بے روزگار نوجوان آسانی سے اپنا روزگار کما سکیں۔میٹنگ میں بتایاگیا کہ مختلف کارخانہ داروں اور یونٹوں کی طرف سے تیار کی جانے والی اشیاءکی فروخت کے لئے 125کروڑ روپے کا نشانہ مقرر کیا گیا ہے۔اس موقعہ پر مزیدبتایا گیا کہ بورڈ کی طرف سے کئی نئی تجارتی سرگرمیاں شروع کی گئی ہیں جن میں ہنر افراد کو تربیت دی جائے گی۔

 

جموں / جموں وکشمیر قانون ساز کونسل کی ایتھکس کمیٹی کی ایک میٹنگ ایم ایل سی رانی گارگی بلوریہ کی صدارت میں منعقد ہوئی ۔اس موقعہ پر کمیٹی کے کام کاج سے متعلق مختلف پہلوﺅں پر تبادلہ خیال کیا گیااور چیئرپرسن نے ایوان کے اندر اور ایوان سے باہر ارکان کی طرف سے اخلاقی اقدار پر عمل پیرا رہنے پر زور دیا ۔ ارکان قانون سازیہ سریندرموہن امباردار اور وبودھ گپتا نے میٹنگ میں شرکت کی اور ایتھکس کمیٹی کے کام کاج کے حوالے سے اپنی تجاویز سامنے رکھیں۔کمیٹی نے کہا کہ وہ ارکان کو عوامی نوعیت کے معاملات سیشن کے دوران اُبھرنے کا بھرپور موقعہ دے گی ۔کمیٹی نے تجویز دی کہ ارکان کو پہلے سے ہی اپنے سوالات کونسل سیکرٹریٹ کو پیش کرنے چاہیئے تاکہ متعلقہ محکموں سے تفصیلی جواب مل سکے۔کونسل سیکرٹریٹ کے کئی اعلیٰ افسران بھی میٹنگ میں موجود تھے۔

 

جموں / تعلیم کی وزیر مملکت پریاسیٹھی نے نہرو یواکیندر سنگھٹن کی طرف سے منعقد کئے گئے ایک بھارت شرست تھا ۔بھارت کے تحت سٹیٹ یوتھ ایکسچینج پروگرام کی شروعات کی۔اس پروگرام میں تامل ناڈو کے 50اور ریاست جموں وکشمیر کے 50نوجوان شرکت کر رہے ہیں ۔افتتاحی تقریب آج گورنمنٹ وومنز کالج گاندھی نگر جموں میںمنعقد ہوئی ۔اس موقعہ پر ڈائریکٹر کالجز ، پرنسپل وومنز ڈگری کالج گاندھی جموں، سٹیٹ ڈائریکٹر نہرو یووا کیندر کے علاوہ کئی دیگر شخصیات بھی موجود تھیں۔پریاسیٹھی نے اس موقعہ پر کہا کہ یہ مشن 31اکتوبر 2015ءکو شروع کیا گیا اور اس کا بنیادی مقصد یہ ہے کہ مختلف ریاستوں کی ثقافت اور کلچر کی عکاسی کی جاسکے ۔وزیر موصوفہ نے تامل ناڈو کے نوجوانوں کا ریاست میں خیر مقدم کیا۔ 

 

جموں//ایمپلائزجوائنٹ ایکشن کمیٹی کے صدرعبدالقیوم وانی نے امریکہ کی طرف سے قبلہ اول بیت المقدس کو اسرائیلی دارالحکومت تسلیم کرنے کے اعلان کی شدید الفاظ میں مذمت کی ہے۔یہاں جاری پریس بیان میں ایمپلائزجوائنٹ ایکشن کمیٹی کے صدرعبدالقیوم وانی نے بیت المقدس کواسرائیل کی دارالحکومت بنانے کے اعلان کوامریکہ کی ساز ش سے تعبیرکیا۔انہوں نے کہا کہ امریکی صدر ڈونالڈ ٹرمپ کے تاناشاہی پر مبنی اس اعلان سے عالم اسلام کے دل مجروح ہوئے ہیں اور مذہبی جذبات کو ٹھیس پہنچائی گئی ہے۔ انہوں نے کہا کہ ایسا کوئی بھی اقدام دنیا بھر کے مسلمانوں کو اشتعال دلا سکتا ہے جو نہ صرف خطے بلکہ دنیا کے امن، سلامتی اور استحکام کیلئے سنگین ہو سکتاہے۔وانی نے اس مسئلے پر اقوام متحدہ کے ردعمل کاخیرمقدم کیا۔

 

جموں// وزیراعلیٰ محبوبہ مفتی نے کیلر شوپیاں میں ایک کیش وین کے ساتھ جارہے دو سیکورٹی گارڈس کی ہلاکت کی سخت مذمت کی ہے ۔ ایک بیان میں وزیر اعلیٰ نے اس واقعہ کو بدقسمتی سے تعبیر کیا جس میں عوام کے پیسے کی حفاظت پر مامور اہلکاروں کو ہلاکت کیا گیا ہے۔محبوبہ مفتی نے ہندوارہ میں ایک تلاشی کارروائی کے دوران ایک خاتون کی ہلاکت پر بھی دُکھ اور صدمے کا اظہار کیا ہے۔انہوںنے کہا کہ وہ ہمیشہ تشدد کے منفی اثرات کے بارے میں خبردار کرتی آرہی ہے۔انہوں نے سول سوسائٹی سے ایک بار پھر اپیل کی کہ وہ آگے آکر نوجوانوں کا مستقبل محفوظ اور پُر امن بنائیں۔

 

 

جموں//حکومت جموں وکشمیرنے سب ڈویژنل مجسٹریٹوں کوہدایات دی ہیں کہ وہ جے ڈی اے زمینوں کی نشاندہی کے عمل کو جلد ازجلد مکمل کرکے حکومت کوتفصیلی رپورٹ پیش کریں۔ جے ڈی کے مطابق جموں شہر میں جے ڈی اے کی 1,510ایکڑزمین پرناجائزقبضہ ہے اورابھی 6818 ایکڑ کی نشاندہی کرنا باقی ہے ۔ڈپٹی کمشنر کمارراجیورنجن نے سب ڈویژنل مجسٹریٹوں کوہدایات دی ہیں کہ وہ جے ڈی اے زمین کی تازہ صورتحال کے بارے میں تفصیلات پیش کریں اورنشاندہی کاکام جلدازجلد مکمل کریں اورمحکمہ مال کے فیلڈعملہ کی ہفتہ وار میٹنگوں کے انعقا دکویقینی بنائیں۔ترجمان نے کہاکہ 83دیہاتوں میں سے 33 میں نشاندہی کاکام مکمل کیاگیاہے ۔قابل ذکرہے کہ سال 1973 ءسے جموں وکشمیرحکومت نے 4979ایکڑزمین جے ڈی اے کوڈیولپمنٹ کی غرض سے منتقل کی ہے۔جے ڈی اے کی طرف سے 1973 سے اب تک صرف 2245ایکڑزمین کی ہی نشاندہی کی ہے جبکہ ابھی تک قبضہ کی گئی330ایکڑاراضی کی نشاندہی کرناباقی ہے ۔جموں میں جے ڈی اے کی 1510ایکڑپرناجائزقبضہ ہے ۔

 

جموں// وزیر اعلیٰ محبوبہ مفتی نے دوروزقبل ادھمپور ضلع کے چنہنی علاقے میں پیش آئے سڑک حادثے میں 6افراد کے جاں بحق ہونے پر دُکھ اور صدمے کا اظہار کیا ہے ۔وزیر اعلیٰ نے سوگوار کنبوں کے ساتھ ہمدردی کا اظہار کرتے ہوئے مہلوکین کی ابدی سکون کے لئے دعا کی۔محبوبہ مفتی نے اس حادثے میں زخمی ہوئے افراد کے ساتھ بھی ہمدردی کا اظہار کرتے ہوئے ادھمپور ضلع انتظامیہ کو ہدایت دی کہ وہ زخمیوں کو ہر ممکن طبی سہولیات دستیاب کریں۔وزیر اعلیٰ نے ٹریفک حکام کو قومی شاہراہ کے ساتھ ساتھ دیگر مقامات پر بھی ٹریفک قوانین کی سختی سے عمل آوری کو یقینی بنانے کی ہدایت دی تاکہ اس طرح کے حادثات کو روکا جاسکے۔علاوہ ازیں نیشنل کانفرنس کے صدرفاروق عبداللہ اورقائمقام صدرعمرعبداللہ دوروزقبل ادھمپور ضلع کے چننئی علاقے میں پیش آئے سڑک حادثے میں 6افراد کے جاں بحق ہونے پر دُکھ اور صدمے کا اظہار کیا ہے۔تعزیتی پیغامات میں نیشنل کانفرنس لیڈران نے اللہ تعالیٰ سے مرحومین کے روح کی تسکین اورلواحقین کوصبرجمیل عطافرمانے کی دعاکی۔صوبائی صدرجموں نیشنل کانفرنس دویندرسنگھ رانا ،ضلع صدرادھم پور سنیل ورما کے علاوہ پشپاڈوگرہ نے بھی ادھم پورچہنینی سڑک حادثے پرگہرے رنج ودُکھ کااظہارکرتے ہوئے غمزدہ کنبوں کے ساتھ گہری ہمدردی ظاہر کی ہے۔

 

جموں//بلاک ترقیاتی دفتر نگروٹہ کی جانب سے پنچایت جگٹی میں ایک گرام سبھا کا انعقاد کیا گیاجس کی صدارت مقامی گرام سیوک نے کی۔گرام سیوک یونس ملک نے دور دراز کے علاقوں سے آئے ہوئے لوگوں کی پریشانیاں سنیں اور وھاں پر لوگوں کے سال2018.19 میں ہونے والے کاموں کا خاکہ تیار کیا گیا۔اس موقع پر الگ الگ وارڈو سے آئے ہوئے لوگوں نے اپنے اپنے کام گرام سیوک کو نوٹ کروائے۔اس دوران سابق سرپنچ آسا رام۔دیگر پنچ حضرات اور مقامی لوگ جن میں عبدل غنی۔نسیم بی بی عبدل رفیق۔محمد لطیف ودیگران موجود تھے اورانہوں نے گرام سیوک کا شکریہ ادا کیا اور ان سے اپیل کی کے وہ ہفتہ میں ایک دو دن پنچایت گھر میں ضرور تشریف لائیں۔تاکہ لوگوں کی پریشانیاں حل ہو سکیں۔

 

جموں//ریٹائرڈسپرانٹنڈنٹ آف پولیس پروفیسررشی ڈوگرہ نے شیرکشمیربھون میں پارٹی سرپرست ڈاکٹرفاروق عبداللہ کی موجودگی میں نیشنل کانفرنس میں شمولیت اختتارکی۔اس دوران پارٹی سرپرست ڈاکٹرفاروق عبداللہ ودیگرلیڈران نے پروفیسررشی ڈوگرہ کاپارٹی میں والہانہ استقبال کیااورامیدظاہرکی کہ پروفیسررشی کی شمولیت سے پارٹی زمینی سطح پرمضبوط ہوگی۔فاروق عبداللہ نے کہاکہ نیشنل کانفرنس جموں ریاست جموں وکشمیرکی عوام کی خدمت اورریاست میںامن اورترقی یقینی بنانے کی خواہاں ہے۔ اس موقعہ پرپارٹی لیڈران نے نیشنل کانفرنس کارکنان پرزوردیاکہ وہ اپنے علاقوں کے لوگوں کودرپیش مسائل کے ازالہ کےلئے اقدامات اُٹھائیں ۔رشی ڈوگرہ ،پولیس میں ملازمت جوائن کرنے سے پہلے پروفیسرتھے ۔انہوں نے کہاکہ وہ نیشنل کانفرنس کے پلیٹ فارم سے عوام کی خدمت کریں گے اورپارٹی کے منشورکوزمینی سطح پرلیجائیں گے۔اس موقعہ پر ایڈیشنل سیکریٹری ڈاکٹرشیخ مصطفےٰ کمال، صوبائی صدرجموں دویندرسنگھ رانا، ضلع صدرریاسی بابوجگجیون لال، سینئرلیڈرصراف سنگھ ناگ، صوبائی سیکریٹری شیخ بشیراحمد، دپیندرکور، ستونت کورڈوگرہ،انل دھر، پشپ ڈوگرہ، دلشادملک، ریتاگپتا، کے ڈی سنگھ، رشیدہ بیگم، روہت کیرنی ، کومل منہاس، آشامہرہ، تاراچندودیگران بھی موجودتھے۔