جموں/پردیش کانگریس کے جنرل سیکریٹری شاہنوازچوہدری نے یہاں منعقدہ پریس کانفرنس سے خطاب کرتے ہوئے ریاسی میں خانہ بدوش گوجربکروالوں پر شرپسندعناصرکے حملے کی شدیدالفاظ میں مذمت کرتے ہوئے اسے ریاستی حکومت کی ناکامی قراردیاہے ۔انہوں نے کہاکہ گوجربکروال طبقہ ہندوستان نوازہے اورہرمشکل وقت میں اس طبقہ نے ملک اورریاست کی یکجہتی اورسیکولرروایات کوبرقراررکھنے میں کلیدی رول اداکیاہے ۔انہوں نے کہاکہ ملک دوست طبقہ کوشرپسندعناصرکی طرف سے بربریت کانشانہ بناناقابل افسوس ہے ۔شاہنوازچوہدری نے کہاکہ ریاست میں پی ڈی پی۔مخلوط حکومت کے قیام کے روزِ اول سے ہی فرقہ پرست عناصر متحرک ہوگئے تھے اوران پرلگام لگانے کیلئے حکومت کی جانب سے ٹھوس اقدامات نہیں کئے گئے ۔انہوں نے کہاکہ ریاسی میں شرپسندعناصرکاگوجربکروال طبقہ کے لوگوں پربے دردانہ حملہ جمہوریت کے منافی ہے۔انہوں نے کہاکہ نام نہاد گائورکشکوں کے امن پسندلوگوں پرحملوں کی بڑھتی ہوئی واردات سے جمہوری اقدارکوزک پہنچ رہی ہے۔ شاہنوازچوہدری نے کہاکہ گوجربکروال طبقہ کے لوگوں نے ہندوستان کے ساتھ وفاداری کی ہے لیکن شرپسندعناصر طبقہ کے لوگوں کومختلف مقامات پرہراساں کررہے ہیں جوکہ باعث شرم اورافسوسناک بات ہے۔ اس موقعہ پر شاہنوازچوہدری اور سینئرکانگریس لیڈر ایڈوکیٹ شاہ محمدچوہدری نے کہاکہ ریاسی واقعہ میں ملوث تمام شرپسندحملہ آوروں کے خلاف سخت کارروائی عمل میں لائی جائے۔انہوں نے کہاکہ شرپسندعناصر کوحکومت کی پشت پناہی ریاست کے سیکولرتانے بانے کیلئے خطرہ ہے ۔انہوں نے پی ڈی پی اوربھاجپاحکومت پر فرقہ پرستی کوفروغ دینے کاالزام لگاتے ہوئے ریاست میں حالات خراب کرنے والے عناصرکی نکیل کسنے میں ناکام قراردیا۔شاہنوازچوہدری نے کہاکہ اگرریاستی حکومت اورپولیس انتظامیہ نے ریاسی واقعہ کے ملزمان کے خلاف سخت کارروائی عمل میں نہ لائی تو گوجربکروال طبقہ کے لوگوں کومجبورہوکر حکومت کے خلاف مظاہروں کاسلسلہ شروع کرناپڑے گا۔
حکومت فرقہ پرست عناصرپرنکیل کسنے میں ناکام :پردیش کانگریس کمیٹی
