سرینگر//وزیر تعلیم سید محمد الطاف بخاری نے کہا ہے کہ حکومت تمام علاقائی زبانوں خصوصاً کشمیری اور ڈوگری کو یکساں بنیادوں پر فروغ دینے کی وعدہ بند ہے۔ان باتوں کا اظہار وزیر موصوف نے افسروں کی ایک میٹنگ کے دوران کیا جو ریاست کی مختلف یونیورسٹیوں میں علاقائی زبانوں کے فروغ کے لئے پڑھائے جانے والے مختلف کورسوں کا جائیزہ لینے کے لئے طلب کی گئی تھی۔میٹنگ میں تعلیم کی وزیر مملکت پریا سیٹھی بھی موجود تھیں۔ریاست کی یونیورسٹیوں سے ڈوگری زبان کو خارج کرنے کی خبروں کو بے بنیاد قرار دیتے ہوئے وزیر نے کہا کہ حکومت اس علاقائی زبان کو مزید فروغ دینے کی عہد بند ہے۔وزیر نے کہا کہ کشمیری اور ڈوگری زبانیں یکساں اہمیت کی حامل ہیں اور کسی بھی اسامی کو ڈوگری سے کشمیری میں منتقل نہیں کیا گیا ہے۔ میٹنگ کے دوران وزیر موصوف نے فیکلٹی اور زبانوں کے فروغ کے لئے اضافی فیکلٹی کی تعیناتی کا بھی جائیزہ لیا۔اعلیٰ تعلیم کے کمشنر سیکرٹری اصغر حسن سامون کے علاوہ کئی یونیورسٹیوں کے اعلیٰ افسران نے بھی میٹنگ میں شرکت کی۔اس موقعہ پر وزیر نے مختلف تعلیمی اداروں اور یونیورسٹیوں میں پڑھائی جانے والی زبانوں کے تعلق سے فیکلٹی کے بارے میں تفصیلات طلب کیں۔ انہوں نے زبانوں کو فروغ دینے کے لئے مختلف کالجوں کے سربراہوں کو ضروری ہدایات دیں۔میٹنگ میں تعلیمی اداروں کی کارکردگی میں بہتری لانے اور ریاست میں تعلیمی شعبہ¿ کے مزید فروغ کے لئے کئی معاملات پر بھی تبادلہ خیال کیا گیا۔
حکومت علاقائی زبانوںکو فروغ دینے کی وعدہ بند
