حکومت ریاست کے تینوں کی یکساں ترقی کیلئے وعدہ بند: کوہلی

 راجوری//وزیر برائے بھیڑ ، پشو پالن اور ماہی پروری عبدالغنی کوہلی نے کہا ہے کہ حکومت ریاست کے تینوں خطوں کی یکساں ترقی کیلئے وعدہ بند ہے ۔ انہوں نے کہا کہ حکومت نے عوام کے معیار حیات کو بلند کرنے کیلئے متعدد اقدامات اٹھائے ہیں ۔ وزیر موصوف نے ان خیالات کا اظہار آج حلقہ انتخاب کالا کوٹ کے جگنی دیہات میں ایک عوامی اجتماع سے خطاب کرتے ہوئے کیا ۔ وزیر موصوف نے کہا کہ ریاست موجودہ دورِ حکومت کے دوران ترقی کی نئی بلندیوں کو چھو رہی ہے ۔ انہوں نے کہا کہ حکومت نے پسماندہ اور دور دراز علاقوں میں رہنے والے عوام کی سماجی اور معاشی حالت بہتر بنانے کیلئے متعدد اقدامات اٹھائے ہیں ۔ حلقہ انتخاب کالا کوٹ میں جاری ترقیاتی کاموں کا حوالہ دیتے ہوئے وزیر موصوف نے کہا کہ علاقہ میں  متعدد چھوٹے بڑے ترقیاتی پروجیکٹوں پر کام سرعت سے جاری ہے ۔ انہوں نے کہا کہ ان پروجیکٹوں کی بدولت علاقے کے پڑھے لکھے نوجوانوں کو روزگار کے مواقعے میسر ہوں گے ۔ انہوں نے کہا کہ ضلع انتظامیہ راجوری کو ان پروجیکٹوں کے کام میں سرعت لانے اور انہیں مقررہ مدت کے اندر مکمل کرنے کی ہدایت دی  ہے۔ وزیر موصوف نے کہا حلقہ انتخاب کالا کوٹ کو جدید خطوط پر ترقی دینے کیلئے کوششیں جاری ہیں اور اس ضمن میں متعدد اقدامات اٹھائے گئے ہیں ۔ مقامی لوگوں نے وزیر موصوف کو اپنے مسائل سے متعلق ایک یاداشت پیش کی ۔ وزیر موصوف نے یقین دلایا کی اُن کے جائیز مطالبات کو مرحلہ وار طور پر حل کیا جائے گا ۔