عظمیٰ نیوز سروس
سرینگر// نائب وزیر اعلیٰ سریندرکمار چودھری نے کل چیوڈارہ بیروہ پُل کے تعمیراتی کام کا اِفتتاح کیا جو تقریباً 14.15 کروڑ روپے کی لاگت سے تعمیر کیا جا رہا ہے۔یہ 3×37 میٹرنبارڈ کے تحت ایک پروجیکٹ ہے اور یہ پُل علاقے میں رابطے کو بڑھانے میں ایک طویل سفر طے کرے گا۔اس موقعہ پر نائب وزیرا علیٰ نے کہا کہ حکومت جموں و کشمیر میں جامع اور دیرپا ترقی کے لئے پُرعزم ہے۔ اُنہوں نے کہا کہ ترقیاتی منصوبوں سے ایک نئے دور کا آغاز ہو ا ہے۔اُنہوںنے عمل آوری ایجنسیوں کو ہدایت دی کہ وہ کسی بھی رُکاوٹ کو دور کریں جو منصوبے کی پیش رفت میں حائل ہو سکتی ہے۔نائب وزیر اعلیٰ نے زور دیتے ہوئے کہا،’’کام مقررہ مدت میں مکمل ہونا چاہیے تاکہ لاگت میں اضافہ نہ ہو۔‘‘ اُنہوں نے ہدایت دی کہ اگر کوئی رکاوٹیں ہوں تو انہیں باہمی تعاون سے دور کیا جائے۔چودھری نے کہا، ’’پُل پر کام شروع کیا گیا ہے اور بہت جلد پُل کی تعمیر مکمل ہو جائے گی اور اسے علاقے کے مقامی لوگوں کے لئے وقف کیاجائے گا۔‘‘بعد میں اُنہوںنے ٹائون ہال میں متعدد وفود سے ملاقات کی اور حکومت کی جانب سے تیز رفتار ترقی اور عوام کی فلاح و بہبود اور شکایات کے اَزالے کے عزم کا اعادہ کیا۔اِفتتاحی تقریب میں ممبر قانون ساز اسمبلی چاڈورہ علی محمد ڈار، رُکن قانون ساز اسمبلی بیروہ ڈاکٹر شفیع احمد وانی، ایم ایل اے خانصاحب سیف الدین بٹ، ضلع ترقیاتی کمشنر بڈگام ، چیف اِنجینئر آر اینڈ بی، متعلقہ ضلعی اَفسران اور بیروہ کے معزز شہریوں نے شرکت کی۔
