سرینگر//حضرت ولی عصر ؑ کے یوم ولادت باسعادت کے موقعہ پر انجمن شرعی شیعیان کے صدرآغا سید حسن نے حسن آباد سرینگر میں المصطفیٰ ؐ جامع مسجد کا سنگ بنیاد رکھا۔ سنگ بنیاد کی تقریب میںمولانا مسرور عباس انصاری، آغا سید محمد ہادی،آغا سید محمد عقیل ، آغا سید مجتبیٰ عباس ، سید عابد حسین حسینی، سید عابد رضوی، سید محمد حسین صفوی، سید محمد حسین موسوی سمیت متعدد علماء دین کے علاوہ ہزاروں کی تعداد میں فرزندان توحید نے شرکت کی ۔مسجد مذکورہ اپنی وسعت کے اعتبار سے وادی میں شیعیان کشمیر کی سب سے بڑی جامع مسجد ہوگی جس کا رقبہ 19000 مربع فٹ پر محیط ہے اور اس میں بہ یک وقت بارہ ہزار سے زیادہ نمازی نماز ادا کرسکتے ہیں نیز اگر کوئی دینی تقریب کی انجام دہی مطلوب ہو تو بیس ہزار سے زیادہ لوگ مسجد میں سما سکتے ہیں۔ مسجد کی تیسری منزل میں ایک عالیشان کتب خانہ کا قیام بھی عمل لایا جائے گا جہاں علم دوست حضرات کے لئے مطالعہ کی ہر ممکن سہولیت اور اسباب فراہم رہیں گے۔ اس موقعہ پر آغاسید حسن نے کہا کہ مساجد اور دیگر دینی اثاثوں کی تعمیر و تجدید ایمانی جذبے کا واضح مظاہرہ ہے ۔انھوں نے کہا کہ شہر سرینگر میں ایک عالیشان جامع مسجد کی تعمیر نہ صرف ایک ناگزیر ضرورت ہے بلکہ قوم کی دیرینہ خواہش کی تکمیل کے سلسلے میں ایک غیر معمولی قدم ہے۔ تقریب میں شریک دیگر علماء کرام نے بھی مسجد کی اہمیت اور ضرورت پر تفصیلی روشنی ڈالی اور مسجد مذکورہ کو وقت کا تقاضا اور ایک قومی ضرورت قرار دیا۔
حسن آباد میں المصطفیٰ ؐ جامع مسجد کا سنگ بنیاد | دینی اثاثوں کی تعمیر و تجدید ایمانی جذبے کا واضح مظاہرہ :آغا حسن
