سرینگر// پاکستان نے امرےکہ کی جانب سے حزب المجاہدین کو دہشت گرد تنظیم قرار دےئے جانے کو مایوس کن قرار دےتے ہوئے کہا کہ گزشتہ کئی برس سے جاری حق ِخود ارادیت کیلئے کشمیریوں کی جدوجہد جائز ہے۔ ہفتہ وار بریفنگ کے دوران پاکستانی دفتر خارجہ کے ترجمان نفیس زکریا نے کہا ” حقیقت یہی ہے کہ ہم بھارت کے ہمسائے ہیں اورخطے کی سلامتی کو یقینی بنانے کیلئے ہمیں اپنے مسائل کو ختم کرنا ہو گا، پاک بھارت تعلقات میں بنیادی مسئلہ کشمیر کا ہے جس کو بات چیت کے ذریعے حل کرنا ہوگا“ ۔انہوں نے کہا کہ کشمیر میں بھارت کے مظالم میں اضافہ ہوا ہے اور 5 روز میں6 کشمیریوں کو جاں بحق اور 6سے زائد کشمیری نوجوانوں کو زخمی کیا گیا۔زکریا نے کہا کہ حریت قیادت پابند سلاسل ہے اور ادویات بھی فراہم نہیں کی جا رہی ہیں۔انہوں نے کہا کہ پاکستان نے ہمیشہ کہا ہے کہ مسئلہ کشمیر کا ایک ہی حل ہے اور وہ حل کشمیریوں کو اقوام متحدہ کی قراردادوں کے مطابق حق خودارادیت کی فراہمی ہے۔ترجمان کے مطابق بھارت نے کھل کر سی پیک کی مخالفت کی،کلبوشن یادو کا بیان اس حوالے سے ریکارڈ پر موجود ہے جبکہ کوئٹہ دہشت گردی میں بھارت کے ملوث ہونے کے بارے کچھ کہنا قبل از وقت ہوگا۔ نفیس زکریا نے کہا کہ امریکا نے انسداد دہشت گردی کی کوششوں میں ہمیشہ پاکستان کی قربانیوں کو سراہاہے لیکن حزب المجاہدین کو دہشت گرد تنظیم قرار دینا مایوس کن ہے۔
حزب المجاہدین کو دہشت گرد تنظیم قرار دینا مضحکہ خیز،پاکستان اور مزاحمتی جماعتیں برہم
