نیوز ڈیسک
نئی دہلی // سعودی عرب نے اعلان کیا ہے کہ وہ کووڈ19 وبائی امراض کو روکنے کیلئے 3 سال کی پابندیوں کے بعد اس سال کے حج کیلئے عازمین کی تعداد پر مزید کوئی پابندی عائد نہیں کرے گا۔ سعودیہ حج اور عمرہ کے وزیر توفیق الربیعہ نے نامہ نگاروں کو بتایا کہ حجاج کی تعداد کسی عمر کی حد کے بغیر، وبائی مرض سے پہلے کی طرح ہو گی۔
انہوں نے گزشتہ برسوں کے دوران لگائی گئی تمام پابندیوں کو ہٹانے کا بھی اعلان کیا۔5 جنوری 2023 کو وزارت حج اور عمرہ نے مملکت سعودی عرب کے اندر سے آنے والے عازمین کیلئے فریضہ حج کی ادائیگی کیلئے رجسٹریشن شروع کرنے کا اعلان کیا گیااور اس سال حج میں خواتین کیلئے محرم کی ضرورت نہ رکھنے کا فیصلہ کیا گیا۔باور کیا جاتاہے کہ سال2023 میں حج سیزن کا آغاز 26 جون سے متوقع ہے۔2020 کے بعد یہ پہلا موقع ہوگا جب دنیا بھرکے مسلمانوں کو اسلام کے پانچویں ستون کو غیر مشروط طور پر ادا کرنے کی اجازت دی جائے گی۔ سعودی حکومت نے پچھلے دو برسوں میں کووڈ19 ویکسین حاصل کرنے کی شرط رکھی اور عمر کی پابندیاں عائد کیں، کیونکہ اس نے 16 سال سے کم عمر اور 60 سال سے زیادہ عمر والوں کو حج کرنے کی اجازت نہیں دی۔ سال 2021 میں صرف 60ہزارلوگوں نے، جن میں سے سبھی مملکت سعودی کے شہری اور باشندے ہیں، نے حج ادا کیا، جبکہ2020 میں یہ تعداد چند ہزار تھی۔
