عظمیٰ نیوز سروس
سرینگر// لیفٹیننٹ گورنر اوروزیر اعلیٰ عمر عبداللہ نے اتوار کی صبح جموں و کشمیر کے عازمین حج کے پہلے قافلہ کو گرمجوشی سے رخصت کیا، ان کے محفوظ سفر اور مناسک حج کی ہموار کارکردگی کے لیے نیک خواہشات کا اظہار کیا۔ وزیر اعلی صبح سویرے شیخ العالمؒ بین الاقوامی ہوائی اڈے سری نگر پہنچے، جہاں انہوں نے حجاج کرام کی روانگی سے قبل ان سے بات چیت کی۔ کل 178 عازمین سعودی عرب کے لیے براہ راست پرواز میں سوار ہوئے۔ عازمین سے بات چیت کرتے ہوئے وزیر اعلیٰ نے ان کی خیریت اور حج بیت اللہ کی تکمیل کی امید ظاہر کی۔ انہوں نے ان پر زور دیا کہ وہ جموں و کشمیر میں دیرپا امن، خوشحالی اور ترقی کے لیے دعا کریں اور اس کے لوگوں کو مصائب اور مصیبتوں سے بچائیں۔عازمین حج نے حج ہائوس اور سرینگر ہوائی اڈے پر کیے گئے وسیع اور موثر انتظامات کے لیے وزیر اعلی کا شکریہ ادا کیا۔عازمین کے لیے وسیع سہولیات رکھی گئی ہیں، جن میں ہموار نقل و حمل، بورڈنگ اور قیام، سامان کی تصدیق، سیکورٹی اسکریننگ، ریفریشمنٹ، کھانا، نماز کے انتظامات، سفری دستاویزات کی تقسیم اور بورڈنگ پاسز کا فوری اجرا شامل ہیں۔لیفٹیننٹ گورنر نے عازمین کے ساتھ بات چیت کی اور ایک محفوظ یاترا اور حقیقی معنوں میں مکمل روحانی تجربے کے لیے اپنی مبارکباد اور نیک خواہشات کا اظہار کیا۔ انہوں نے جموں و کشمیر کے امن اور خوشحالی اور سب کی بھلائی کے لیے دعا کی۔ایل جی نے کہا”میں مقدس سفر کرنے والے عازمین کو دل کی گہرائیوں سے مبارکباد پیش کرتا ہوں، زیارتکرنا زندگی بھر کا خواب ہے۔ مرکزی حکومت عازمین کی فلاح و بہبود اور ان کے مقدس یاترا کے لیے بہترین ممکنہ انتظامات کو یقینی بنانے کے لیے پابند عہد ہے،” ۔اس سال مرکز کے زیر انتظام ریاست جموں کشمیر سے تقریبا 3622 عازمین حج کی سعادت حاصل کریں گے۔ سری نگر بین الاقوامی ہوائی اڈہ 4 سے 15 مئی 2025 کے درمیان 11 پروازیں چلانے والا ہے، جس میں جموں و کشمیر سے تقریباً 3132 اور لداخ کے 242 عازمین حج کو سہولت فراہم کی جائے گی۔
