عازم جان
بانڈی پورہ// بانڈی پورہ پولیس نے حاجن علاقے میں غیر مقامی مزدور کے قتل میں ملوث 3ملی ٹینٹوں کو حراست میں لینے کا دعویٰ کیا ہے۔ ہفتے کے روز ایک پریس کانفرنس میں ایس ایس بانڈی پورہ محمد زاہد نے بتایا کہ امسال ابتک ضلع میں تین ملی ٹینٹ مارے گئے، 9 ہابرڈ ملی ٹینٹ گرفتار جبکہ ملی ٹینٹ مدد گاروں کے چھ گروپوں کو بھی طشت از بام کیا گیا۔انہوں نے کہا کہ سد نارہ حاجن میں 11 اور 12 اگست کی درمیانی شب مشتبہ ملی ٹینٹوں نے ایک غیر مقامی مزدور17سالہ امریز مسوری ساکن بہار کو گولی مار کر قتل کیا۔انہوں نے بتایا کہ اطلاع ملتے ہی پولیس نے کیس درج کرکے تحقیقات شروع کی جس دوران کئی مشتبہ افراد کو پوچھ تاچھ کے سلسلے میں گرفتار بھی کیا گیا۔
اْن کے مطابق پیشہ وارانہ اور ٹیکنیکی صلاحیتوں کو بروئے کار لا کر پولیس نے تفتیش کا دائرہ مزید وسیع کیا جس دوران کئی افراد کا نام سامنے آیا۔انہوں نے بتایا کہ وسیم اکرم ، یاور ریاض اور مزمل شیخ ساکنان سدنارہ نامی ملی ٹینٹوں کے بارے میں پتہ چلا کہ وہ پاکستانی لشکر ہینڈ لرز کے ساتھ مسلسل رابطے میں ہیں اور انہوں نے قتل کی اس واردات کو انجام دیا۔ایس ایس پی نے کہاکہ پاکستانی ہینڈلر بابر کی ہدایت پر ہی غیر مقامی مزدور کو قتل کرنے کا کام گرفتار شدہ ملی ٹینٹوں کو سونپا گیا تاکہ علاقے میں نہ صرف خوف و دہشت کا ماحول قائم کیا جاسکے بلکہ غیر مقامی مزدور وادی کشمیر سے بھاگ سکے۔انہوں نے بتایا کہ تینوں کی گرفتاری عمل میں لا کر اْن کے قبضے سے قابل اعتراض مواد بھی برآمد کیا گیا۔اْنہوں نے کہاکہ ایک پستول ، ایک میگزین اور چار راونڈ برآمد کرکے ضبط کیا گیا۔ایس ایس پی کا مزید کہنا تھا کہ بانڈی پورہ پولیس نے امسال ابتک تین ملی ٹینٹوں کو مار گرایا جن میں ایک غیر مقامی جنگجو بھی شامل تھا۔اْن کے مطابق امسال ابتک نو ہابرڈ جنگجووں کی گرفتاری عمل میں لائی گئیں جبکہ چھ بالائی زمین ورکروں کے گروہ کا بھی پردہ فاش کیا گیا۔
