عظمیٰ نیوز سروس
سرینگر//جموں و کشمیر سول سوسائٹی فورم اور جموں و کشمیر پنشنرز یونائیٹڈ فرنٹ کے چیئرمین عبدالقیوم وانی نے جموں و کشمیر بینک کی طرف سے ہزاروں ملازمین اور پنشنرز کے کھاتوں سے دوہری EMI قسطوں کی حیران کن اور من مانی کٹوتی پر گہری تشویش اور شدید مذمت کا اظہار کیا ہے۔وانی نے کہا کہ یہ سنگین مالی حادثہ ایک ایسے وقت میں پیش آیا ہے جب لوگ عید کا مقدس تہوار منانے کی تیاری کر رہے تھے، جس سے جموں و کشمیر کے لاتعداد گھرانوں کو جذباتی اور مالی پریشانی کا سامنا کرنا پڑا۔انہوں نے ملازمین اور پنشنر اکاؤنٹس سے کٹوتی رقم کی فوری واپسی کا مطالبہ کیا۔ادھر کشمیر ٹریڈ الائنس کے صدر اعجاز شاہدرنے کہا کہ متعدد تاجروں کی شکایات موصول ہونے کے بعد یہ معاملہ بینک کی انتظامیہ کے ساتھ اٹھایا ہے۔انہوںنے بینکوں پر زور دیا کہ وہ ان کٹوتیوں کو روکیں اور ایک متوازن اور شفاف پالیسی وضع کرنے کے لیے تجارتی نمائندوں سے مشاورت شروع کریں۔
