عظمیٰ نیوز سروس
سرینگر// جی ایس ٹی ہفتہ کی تقریبات کل ایک پینل ڈسکشن کے ساتھ اختتام پذیر ہوئیں جس کا مقصد افسران اور اہلکاروں کو اشیاء وخدمات ٹیکس نظام کو گہرائی سے سمجھنا ہے۔اس پینل میں کمشنر اسٹیٹ ٹیکس جے اینڈ کے، ڈاکٹر رشمی سنگھ (آئی اے ایس)، ایڈیشنل کمشنر ٹی پی اینڈ اے آر انکیتا کار (آئی آر اے ایس)، ایڈیشنل کمشنر کشمیرشکیل مقبول (آئی سی اے ایس)، سابق کمشنر اسٹیٹ ٹیکس جے اینڈ کے، کفایت حسین رضوی (آئی اے ایس) ڈائریکٹر ڈی ڈی نیوز سری نگر، سلمان قاضی،بشیر احمد (IRS)،ڈپٹی کمشنر انکم ٹیکس شکیل احمد گنائی (IRS) چیف ایریا منیجر ریلوے ثاقب یوسف (IRTS) رجسٹرار آف کمپنیز حامد بخاری (ICLS) امریندر سنگھ ڈپٹی ڈائریکٹر ED اور مصدق باسو انچارج سائبر کرائم انویسٹی گیشن سنٹر شامل تھے۔
پینل نے جی ایس ٹی کے مختلف پہلوؤں اور معیشت پر اس کے مثبت اثرات، وی اے ٹی سے جی ایس ٹی نظام میں منتقلی میں درپیش چیلنجز، بیداری کے اقدامات کی اہمیت،مختلف النوع شعبہ جاتی اور مختلف محکمہ جاتی طریقہ کار کی اہمیت، جی ایس ٹی کے شعبہ جاتی مخصوص مضمرات، جی ایس ٹی فریم ورک کو آسان بنانے اور ان پر تبادلہ خیال کیا۔پینل ڈسکشن جی ایس ٹی فریم ورک، اس کے فوائد، چیلنجز، اور آگے بڑھنے کے راستے کو بہتر طور پر سمجھنے کے قابل بناتا ہے۔ کمشنر اسٹیٹ ٹیکسز جموں وکشمیرنے کہاکہ جی ایس ٹی ماحولیاتی نظام میں شامل مختلف محکموں کے درمیان مزید تعاون اور تال میل کی ضرورت ہے۔ ریاستی ٹیکس محکمہ، سی جی ایس ٹی حکام، انکم ٹیکس ڈیپارٹمنٹ، مالیاتی اداروں اور دیگر اسٹیک ہولڈرز کے درمیان قریبی تعامل اور معلومات کا تبادلہ موثر نفاذ کو یقینی بناتا ہے، ٹیکس چوری کو روکتا ہے اور بغیر کسی رکاوٹ کے تعمیل میں سہولت فراہم کرتا ہے۔ڈائریکٹر ڈی ڈی نیوز سری نگر نے کہا کہ معلومات کی بروقت اور جامع ترسیل کاروباریوں کو اپنی ذمہ داریوں کو سمجھنے، تعمیل کے چیلنجوں کو کم کرنے، اور رضاکارانہ تعمیل کی حوصلہ افزائی کرنے میں اہم کردار ادا کرتی ہے۔ایڈیشنل کمشنر کشمیر نے جعلی آئی ٹی سی کی لعنت کو ختم کرنے کی ضرورت کو واضح کیا۔ انہوں نے کہا کہ محکمہ نے ایک کثیر الجہتی حکمت عملی اپنائی ہے جس میں مختلف محکموں کے ساتھ مضبوط اور حقیقی وقت میں معلومات کے تبادلے کا طریقہ کار، AI کا مستعد اطلاق، مشین لرننگ، BIFA، اقتصادی ذہانت، آڈٹ، آگاہی مہم وغیرہ شامل ہیں۔
