جی ایس ٹی پرحکومت کاغیرواضح موقف ریاست کیلئے نقصان دہ : بھلہ

جموں// کانگریس کے سینئرلیڈر وسابق وزیر رمن بھلہ نے کہاہے کہ سبزیوں اورمیوئوں کی بڑھتی ہوئی قیمتوں کے پیش نظر غریب اورمتوسط طبقہ کاجینادوبھرہوگیا ہے۔انہوں نے کہاکہ جی ایس ٹی پر ریاستی سرکار کے واضح موقف نہ ہونے کی وجہ سے سبزیوں اورپھلوں کی قیمتوں میں 300 فیصد اضافہ ہوگیاہے جبکہ گذشتہ تین سالوں کے دوران ملازموں کی تنخواہوں اورعام آدمی کی آمدن میں صرف 10 سے 15 فیصد اضافہ ہوسکاہے ۔ رمن بھلہ نے ان خیالات کااظہار آج یہاں حلقہ انتخاب گاندھی نگر کے متعدد علاقوں سے آئے ہوئے لوگوں کے ساتھ بات چیت کے دوران کیا۔ انہوں نے کہاکہ ریاست میں جب سے پی ڈی پی۔ بی جے پی کی مخلوط سرکار وجود میں آئی ہے۔ ریاست کاہرشخص پریشان ہے۔ایک طرف تو تعمیروترقی کے سبھی کام رُکے پڑے ہیں۔عوام گوناگوں مشکلات ومسائل سے دوچارہے ۔مہنگائی نے عام آدمی کی کمرتوڑ کررکھ دی ہے ۔ بھلہ نے یکم جولائی 2017 سے ریاست میں جی ایس ٹی لاگو نہ کرنے پر تشویش کااظہار کیاجس کی وجہ سے صنعت وتجارت پرکافی خراب اثرپڑرہاہے ۔انہوں نے جی ایس ٹی جلدلاگوکرنے کامطالبہ کیا۔