جیٹلی بتائیں ملک کا وزیر خزانہ کون ہے :کانگریس

 نئی دہلی// کانگریس نے مرکزی وزیر ارون جیٹلی کی طرف سے پارٹی پر ملک میں غربت دور کرنے کے لئے 'صرف نعرہ دینے ' کے الزام پر سخت تبصرہ کرتے ہوئے آج کہا کہ مسٹر جیٹلی کو پہلے یہ راز سب کے سامنے کھولنا چاہیے کہ وزارت خزانہ کی ذمہ داری کس کے پاس ہے ۔مسٹر جیٹلی نے اپنے فیس بک پوسٹ میں الزام لگایا تھا کہ کانگریس نے غربت دور کرنے کے لئے صرف نعرہ دیا تھا جبکہ مودی حکومت نے غربت مٹانے کے لئے وسائل اکٹھا کئے ہیں۔کانگریس کے محکمہ مواصلات کے سربراہ رندیپ سرجے والا نے مسٹر جیٹلی کے الزامات پر نامہ نگاروں کے سوالات کے جواب میں ملک کی معیشت کو لے کر عالمی بینک کی رپورٹ پر خوشی ظاہر کی، لیکن ساتھ ہی کہا کہ اصلیت یہ ہے کہ ملک کا وزیر خزانہ کون ہے یہ واضح نہیں ہے ۔جس کا خمیازہ ہماری معیشت کو بھگتنا پڑ رہا ہے ۔ ملک کا برآمد گھٹ رہا ہے ، جی ایس ٹی کی پیچیدگی کی وجہ سے سرمایہ کاری گھٹ رہی ہے ، پٹرول اور ڈیزل کی قیمتیں آسمان چھو رہی ہیں اور معیشت کاآئینہ سمجھا جانے والا روپیہ کمی کے نت نئے ریکارڈ بنا رہا ہے ۔انہوں نے کہا کہ مسٹر جیٹلی کو حکومت کی حمایت میں فیس بک پر تبصرہ کرنے کی بجائے اس راز سے پردہ اٹھانا چاہئے کہ ملک کا وزیر خزانہ کون ہے جن کے رہتے ہوئے ہماری معیشت چوپٹ ہو رہی ہے ۔ترجمان نے کشمیر پالیسی کو لے کر بھی بی جے پی حکومت پر تنقید کی اور کہا کہ ریاست میں حکومت بنانے کے لئے پی ڈی پی کے ساتھ بے جوڑ اتحاد کرکے اس نے کشمیر کے امن کو نقصان پہنچایا ہے ۔ وہاں دہشت گردی میں اضافہ ہواہے اور ملک کو دہشت گردی کے واقعات میں تین سو سے زیادہ فوجیوں کی شہادت کا دکھ جھیلنا پڑا ہے ۔انھوں نے اس اتحاد کے لئے وزیر اعظم نریندر مودی اور پی ڈی پی لیڈر محبوبہ مفتی کو ذمہ دار ٹھہرایا اور الزام لگایا کہ سیاسی مساوات کے مطابق، اپنی سھولیت کودیکھتے ہوئے یہ دونوں پارٹی اتحاد بناتی ہے اور پھر اسے توڑ دیتی ہے ۔یواین آئی