عظمیٰ نیوز سروس
سکما// آندھرا پردیش اور چھتیس گڑھ کی سرحد کے گھنے جنگلی علاقے میں منگل کی صبح سکیورٹی فورسز اور نکسلی انتہاپسندوں کے درمیان ہوئی بڑی جھڑپ میں چھ نکسلی مارے گئے ۔ ابتدائی اطلاعات کے مطابق ہلاک ہونے والوں میں بڑے کیڈر کا دستہ انچارج بھی شامل ہے ۔ جھڑپ اللّوری سیتا رام راجو ضلع کے ماریڈمِلّی تھانہ علاقے کے پامالیرو جنگل میں کل صبح ہوئی، جہاں گزشتہ کئی دنوں سے نکسلی سرگرمیوں اور ٹھکانوں کی خبریں مل رہی تھیں۔ اس جھڑپ میں پی ایل جی اے کمانڈر ہِڑما اور اس کی بیوی کے مارے جانے کی بھی غیر مصدقہ خبر ہے ، جس کی باضابطہ تصدیق ابھی باقی ہے ۔خفیہ اطلاع کی بنیاد پر آندھرا کی سکیورٹی فورسز نے آج صبح تقریباً چھ بجے تلاشی کارروائی شروع کی۔ فورسز کے جنگل میں آگے بڑھتے ہی نکسلیوں نے شدید فائرنگ شروع کر دی، جس کے بعد تقریباً دو گھنٹے تک مڈبھیڑ جاری رہی۔جوابی کارروائی میں سکیورٹی فورسز نے محاذ سنبھالتے ہوئے موقع سے چھ نکسلیوں کی لاشیں برآمد کیں۔ تلاشی کے دوران ہتھیار، گولہ بارود اور بڑی مقدار میں نکسلی مواد بھی ملا ہے ۔بستر رینج کے پولیس آئی جی، سندر راج پٹّالِنگم نے میڈیا سے بات چیت میں کہا کہ ”سرحدی علاقے سے ایک نہایت اہم اطلاع سامنے آ رہی ہے ۔ اگرچہ باضابطہ تصدیق کا انتظار ہے ، لیکن ابتدائی اشارے بتاتے ہیں کہ یہ ملک میں بائیں بازو کی انتہاپسندی کے خاتمے کے لیے تاریخی کامیابی ثابت ہو سکتی ہے ۔”ان کے مطابق جھڑپ کے مقام اور آس پاس کے علاقے کو پوری طرح محاصرے میں لیا گیا ہے اور سرچ آپریشن اب بھی جاری ہے ۔افسروں نے بتایا کہ اضافی فورسز کو الرٹ پر رکھا گیا ہے اور ضرورت پڑنے پر آپریشن کا دائرہ مزید وسیع کیا جا سکتا ہے ۔
