یو این آئی
سرینگر// جواہر نگر سرینگر میں سنیچر کی شام نوجوان پر تیز دھار والے ہتھیار سے حملہ کرنے کی پاداش میں پولیس نے دو ملزموں کی گرفتاری عمل میں لائی ہے۔پولیس کے ایک ترجمان نے ’ایکس‘ پر جانکاری فراہم کرتے ہوئے بتایا کہ راجباغ تھانہ میں درج ایف آئی آر زیر نمبر 45کے سلسلے میں پولیس نے دو ملزموں عمر فیاض شیخ ولد فیاض احمد ساکن اخراج پورہ اور عمران مشتاق وانی ولد مشتاق احمد وانی ساکن جواہر نگر سرینگر کو حراست میں لیا ہے۔انہوں نے بتایا کہ سنیچر کی شام جواہر نگر میں نوجوان پر تیز دھار والے ہتھیار سے حملہ کرنے کی پاداش میں دونوں کو دھر دبوچ کر سلاخوں کے پیچھے دھکیل دیا گیا۔
سنیچر کی شام جواہر نگر میں اس وقت سنسنی کا ماحول پھیل گیا جب ایک نوجوان پر نامعلوم افراد نے چاقو سے حملہ کرکے اس کو زخمی کردیا ۔آس پاس موجود لوگوں نے زخمی نوجوان کو ہسپتال منتقل کیا جہاں اس کا علاج ومعالجہ چل رہا ہے۔وادی کشمیر میں چاقو اور دوسرے تیز دھار والے ہتھیاروں سے حملہ کرنے کے واقعات میں غیر معمولی اضافہ دیکھنے کو مل رہا ہے۔ اگر چہ ضلع انتظامیہ نے چاقو کی خرید و فروخت پر پابندی عائد کی ہے تاہم اس کے باوجود بھی چھرا زنی کے واقعات مسلسل بڑھ رہے ہیں۔
