یو این آئی
نئی دہلی//بینکنگ سے محروم لوگوں کو مالیاتی نظام سے جوڑنے کیلئے 11سال قبل شروع کی گئی جن دھن یوجنا کے تحت گزشتہ 11برسوں میں 56.21کروڑ بینک کھاتے کھولے گئے ہیں، جن میں کل 2,65,503کروڑ روپے جمع ہیں۔پردھان منتری جن دھن یوجنا 28اگست 2014کو شروع کی گئی تھی۔ ان جن دھن کھاتوں نے مختلف سرکاری اسکیموں کے لیے براہ راست فائدہ کی منتقلی، غریبوں کو قرض کی سہولیات اور سماجی تحفظ فراہم کرنے میں اہم رول ادا کیا ہے۔ جن دھن کھاتہ داروں کو 38 کروڑ سے زیادہ مفت روپے کارڈ جاری کیے گئے ہیں، جس نے ڈیجیٹل لین دین کو فروغ دیا ہے۔ وہیں ، 13.55 لاکھ بینک مترلوگوں کو بینکنگ خدمات فراہم کررہے ہیں، جس کے لیے پہلے بینک جانا پڑتا تھا۔خاص بات یہ ہے کہ 67فیصد جن دھن کھاتے دیہی یا نیم شہری علاقوں میں کھولے گئے ہیں اور ان میں 56 فیصد کھاتے خواتین کے ہیں، جس سے ظاہر ہوتا ہے کہ اس اسکیم کے ذریعے ملک کے دور دراز علاقوں میں رہنے والے محروم لوگوں کو رسمی طور پر مالیاتی نظام سے جوڑا گیا ہے۔جن دھن کھاتہ کھولتے وقت رقم جمع کرنا ضروری نہیں ہے اور اس میں کوئی کم از کم ماہانہ بیلنس رکھنا ضروری نہیں ہوتا۔ ہر کھاتہ ایک مفت روپے ڈیبٹ کارڈ کے ساتھ آتا ہے، جو 2 لاکھ روپے کا حادثہ بیمہ کور فراہم کرتا ہے، اس طرح ڈیجیٹل لین دین اور مالی تحفظ کو فروغ دیتا ہے۔ کھاتہ یافتگان 10,000 روپے تک کی اوور ڈرافٹ سہولت کے بھی اہل ہیں، جو ہنگامی صورت حال میں سکیورٹی فراہم کرتی ہے۔
