سرینگر// نیشنل کانفرنس کے صدر ڈاکٹر فاروق عبداللہ نے عالم یوم شجر کاری کے موقعے پر تینوں خطوں کے عوام سے تلقین کی کہ وہ ماحولیاتی توازن کو برقرار رکھنے کیلئے شجرکاری مہم میں بڑھ چڑھ کر حصہ لیں۔ اُنہوں نے سکولوں ، کالجوں ، یونیورسٹی ، مساجد کے صحنوں اور عام شہرائوں کے اردگرد پودے لگانے پر زور دیا۔اُنہوں دیہات میں رہنے والوں لوگوں سے تاکید کی ،کہ وہ شجرکاری کی جاری مہم میں بڑھ چڑھ کر حصہ لیکر زیادہ سے زیادہ پودے اپنے گرد نواح میںلگائے۔ اُنہوں نے کہا کہ اسلام میں درخت لگانے کی اہمیت پر کافی زور دیا گیا ہے ۔انہوں نے کہا ہمارے پیر کامل حضرت شیخ العالم شیخ نورالدین نورانیؒکے کلام ’’ان پوشہ تیلہ،یلہ ون پوشہ‘‘ پر عمل کرکے جنگلات کی حفاظت اور سبز سونے کی دولت کو بڑھاوا دینے کی طرف توجہ دینا ہر ذی شہری کا فرض ہے۔ انہوں نے کہا نامساعد حالات کے دوران جنگلات کو خاصا نقصان پہنچایا گیا ہے اور اب جنگلات کے ساتھ ساتھ آبی ذخائیر بھی سکڑتے جارہے ہیں اور غیر معمولی تبدیلی کے بُرے اثرات مرتب ہورہے ہیں۔ انہوں نے کہا کہ ماحولیاتی توازن کو برقرار رکھنا ہم سب کی مشترکہ ذمہ داری ہے اور ہمیں شیخ العالمؒ کے ارشاد پر عمل پیرا ہونے کی ضرورت ہے۔اُنہوں نے لوگوں سے اپیل کی ،کہ وہ زیادہ سے زیادہ درخت لگانے کے پروگرام کو کامیاب بنانے کیلئے دوسرے لوگوں کو بھی اِس مہم میں شامل کریں۔
جنگلات کی حفاظت ہرذی شعورشہری کافرض
