عظمیٰ نیوز سروس
سرینگر// جموں و کشمیر اور لداخ ہائی کورٹ نے یہاں ایک شخص کی اپیل مسترد کر دی جس میں ایک نابالغ کے جنسی استحصال کے معاملے میں نچلی عدالت کی طرف سے اس کی سزا کو چیلنج کیا گیا تھا۔جسٹس سنجے دھر کی عدالت نے 22 فروری کو ایڈیشنل سیشن جج (فاسٹ ٹریک کورٹ)کولگام کے فیصلے میں سزا کو برقرار رکھا۔ملزم سجاد احمد بٹ کو رنبیر پینل کوڈ (RPC) کی دفعہ 511 کے ساتھ دفعہ 376 کے تحت قصوروار ٹھہرایا گیا اور اسے چار سال کی سخت قید اور 10,000 روپے جرمانے کی سزا سنائی گئی۔تاہم، بٹ نے مجرمانہ فیصلے اور سزا کے حکم کو چیلنج کیا تھا ۔ہائی کورٹ نے کہا کہ ریکارڈ پر ایسے شواہد موجود ہیں جو یہ ظاہر کرتے ہیں کہ اپیل کنندہ/ملزم نے متاثرہ کے ساتھ چھیڑ چھاڑ کی ہے۔ہائی کورٹ نے کہا کہ اس نے اپیل میں کوئی میرٹ نہیں پایا، اور ٹرائل کورٹ کی طرف سے سنائے گئے سزا کے فیصلے کو برقرار رکھا جاتا ہے اور اسی کے مطابق اپیل کو خارج کر دیا جاتا ہے۔ہائی کورٹ نے کہا کہ اپیل کنندہ، جو زیر حراست ہے، ٹرائل کورٹ کی طرف سے سنائی گئی سزا کی بقیہ مدت تک جیل میں ہی رہے گا۔
