ملک منظور
عجیب قسم کا جنازہ تھا ۔شہر کے سبھی مرد اپنے کندھوں پر ایک ایک لاش لے کر جنازہ گاہ کی طرف دوڑ رہے تھے ۔کسی کو معلوم نہیں تھا کہ کون کس کے جنازے میں شریک ہونے جار رہا ہے۔عورتیں دور سے اس لاوارث میت کو آنکھیں پھاڑ کے دیکھ رہیں تھیںلیکن کسی کے چہرے پر ماتمی صورت نہ تھی ۔بچے اچنبھے میں ایک دوسرے کی انگلیاں تھامے دھبے پاوں والدین کے پیچھے پیچھے چل رہے تھے ۔ جنازہ بہت بڑا تھا لیکن شور بہت کم ۔لاشیں ان گنت تھیں لیکن تعسف کرنیوالے نا کے برابر ۔
سب لوگوں نے جب اپنی اپنی میت کا جنازہ خود ہی ادا کیا تو کسی کو آواز دئے بغیر اپنی اپنی میت کو شہر کے بہت بڑے مزار میں لے گئے اور خود اپنے ہاتھوں سے قبریں کھودنے لگے ۔گہری قبر میں لاش کو دفن کرنے کے بعد جب لوگ واپس لوٹے تو اس شہر کا ہوا نوعہ بدل گیا۔ اصولوں کی مضبوط دیواریں ٹوٹنے لگیں۔صداقت کے دیئے بجھنے لگے ۔عدل کا ترازو ٹوٹ گیا ۔۔لوٹ مار کا طویل سلسلہ شروع ہوگیا ۔عورتوں کی عفت پر انگلیاں اٹھنے لگیں ۔چغل خوری اور غیبت عام ہوگئی ۔سودی کاروبار نے عروج پایا ۔قتل و غارت اور ظلم وجبر رواج ودستور بن گیا۔جھوٹ،فریب اور مکاری وقت کی ضرورت بن گئی ۔عورتوں کے کپڑے پتلے اور چھوٹے ہوگئے۔ شراب، بدکاری اور عیاشی پنپتی گئی ۔حرام و حلال کی تمیز زائل ہوگئی ۔ حیوانیت اور رمیدگی نے دلوں کو پتھربنایا ۔نیتیں کالی ہوئیں ۔قدرت کے بنائے قوانین پامال ہوتے گئے ۔
اسی اثنا میں اس شہر سے ایک صاحب بصیرت سفید پوش شخص کا گزر ہوا۔ ۔اس کےایک ہاتھ میں کتاب تھی اور دوسرے ہاتھ میں لاٹھی ۔
شہر کی گلیوں میں انسانیت کی جلتی ہوئی راکھ کو دیکھ کر اس نے خود سے کہا۔ اس شہر میں تو جلاد رہتے ہیں جو شکل سے انسان ہیں لیکن انسانیت سے کوسوں دور۔ وہ کچھ دور چل کر ایک بوڑھے نانوائی کی دکان پر بیٹھ گیا۔نانوائی ایک مومن صفت شخص تھا ۔اس نے اس شہر کو بچپن سے ہی دیکھا تھا ۔وہ اس شہر کا سی سی ٹی وی کیمرا تھا، جس کے من میں کئی راز پنہاں تھے۔۔نانوائی نے سفید پوش شخص کو ایک روٹی اُٹھا کرکھانے کے لئے پیش کی ۔
بزرگ نے روٹی ہاتھ میں لے کر کہا۔ اس شہر میں خونخوار حیوانوں کی تعداد زیادہ کیوں ہے ؟
نانوائی نے بزرگ سے کہا ۔۔ اس شہر کے لوگوں کی عقل چھوٹی ہے اور زبان لمبی۔! یہ شہر اس رزق کے پیچھے پڑا ہوا ہے جو ان کی پرواز میں کوتاہی لاتا ہے۔
اسی اثنا میں نانوائی کی دکان پر ایک بزرگ خاتون لاٹھی کے سہارے روٹیاں لینے کے لئے آئی ۔نانوائی نے خاتون کو روٹیاں دے دیں اور وہ چلی گئی۔
نانوائی نے بزرگ سے بات چیت جاری رکھتے ہوئے کہا ۔۔اس عورت کے بچے مغرب کے رنگوں میں رنگ گئے اور اس کو مشرق میں چھوڑ دیا ۔اتنی بڑی بڑی عمارتوں میں ایسی چھوٹی چھوٹی مثالیں کثیر تعداد میں ملتی ہیں۔دو مہینے پہلے وفاداری کا پیکر اس کا غریب نوکر اس دنیائے فانی سے کوچ کرگیا ۔اب بیچاری اکیلی جی رہی ہے ۔ایسے بچوں کی ناک خاک آلود نہ ہوگی تو کیا ہوگا۔
اسی اثنا میں ایک کُتا ایکنو زادئیدہ بچہ منہ میں لئے ہوئے ان کے سامنے سے گزرا۔
بزرگ نے پھر پوچھا: بھائی کیا یہ بچہ ۔۔۔۔۔۔۔؟
نانوائی نے بات کاٹتے ہوئے کہا ۔۔ہاں یہ انسانی بچہ ہی تھا ۔۔ایسے سینکڑوں بچے اس شہر کی نالیوں اور کوڑے دانوں میں ملتے ہیں ۔کچھ زندہ تو کچھ مردہ
بزرگ نے حیرانی میں پوچھا ۔۔لیکن یہ بچے ؟
نانوائی نے کہا:یہ یا تو وہ بچے ہیں جنہیں لوگ ماں کے رحم میں ہی قتل کرتے ہیں یا وہ بد نصیب بچے جو ان چاہیے یا عیاشی کا نتیجہ ہوتے ہیں ۔انمعصوم لاشوں کا کوئی جنازہ نہیں ہوتا۔
بزرگ کی آنکھوں سے آنسوؤں کی دھار بہنا شروع ہوگئی ۔
وہ یہ کہتے کہتے اس شہر سے نکل گیا ۔۔یہ ترقی نہیں تنزلی ہے۔ترقی اس کتاب کے پنوں میں ہے ۔اس کو اپناؤ ،اس کو اپنائو ۔ نانوائی نے مسکراتے ہوئے خود سے کہا ۔جس شہر میں لوگوں نے تجھے ہی دفنایا ہو وہاں لوگ تنزلی کو ترقی نہیں تو کیامانیں گے۔
���
قصبہ کھل کولگام
موبائل نمبر؛9906598163
