سرینگر//مرکز کے زیر انتظام جموں کشمیر میں حکام نے جمعرات کو بتایا کہ گذشتہ 24گھنٹوں کے دوران یہاں کوروناوائرس سے متاثر461نئے کیس سامنے آئے ہیں۔
ان میں361کا تعلق وادی کشمیر جبکہ100کا تعلق جموں صوبے سے ہے۔اس طرح جموں کشمیر میں اب تک اس وائرس سے مجموعی طور پر131421افراد متاثر ہوئے ہیں۔
سرکاری ذرائع کے مطابق خطے میں کورونا سے چار مریضوں کی موت بھی ہوئی ہے ۔ان میں ایک موت جموں میں جبکہ تین مریضوں کی اموات کشمیر میں ہوئیں۔
اعداد و شمار کے مطابق سرینگر ضلع مسلسل کورونا وائرس سے سب سے زیادہ متاثر ہے جہاں 157نئے کیس سامنے آئے۔ بارہمولہ ضلع دوسرے نمبر پر ہے جہاں76ایسے کیس ظاہر ہوئے۔آج کولگام تیسرے نمبر پر رہا جہاں49جبکہ بڈگام میں26کیس سامنے آئے۔جموں ضلع میں گذشتہ24گھنٹوں کے دوران61کورونا کے کیس سامنے آئے ہیں۔
حکام نے عوام سے ایک بار پھر اپیل کی ہے کہ وہ احتیاطی تدابیر پر عمل کریں تاہم عوامی حلقے اس بات کو لیکر پریشان ہیں کہ آخر مسافر گاڑیوں اور اسی طرح کے دوسرے مقامات پر کس طرح احتیاط سے کام لیا جاسکتا ہے۔ عوامی حلقے طالب علموں کیلئے بھی فکر مند ہیں جو سکولوںمیںکوئی احتیاط نہیں برتتے ہیں۔
